Organizata Botërore e Shëndetësisë ka reaguar lidhur me panikun që u përhap, pasi autoritetet kineze thanë se kanë gjetur gjurmë të virusit në ushqim dhe paketim të ushqimit.
Udhëheqësi i Programit të OBSH-së për Emergjenca, Mike Ryan, i ka bërë thirrje njerëzve që të mos shqetësohen nga përhapja e koronavirusit përmes ushqimit.
“Njerëzit nuk duhet të frikësohen nga ushqimi, paketimi i tij, apo dërgesat me porosi. Nuk ka të dhëna se ushqimi apo zinxhiri ushqimor është pjesë e përhapjes së virusit. Njerëzit duhet të jenë rehat dhe të sigurt”, tha ai.
Komentet e ekspertit të OBSH-së erdhën pasi dy qytete në Kinë thanë se gjurmët e virusit janë gjetur në ushqim të importuar të ngrirë dhe në paketime të ushqimit, duke ngritur shqetësime se ushqimi i helmuar mund të shkaktojë shpërthime të reja.
Sipas Worldometers, më shumë se 21 milionë njerëz nga e gjithë bota janë prekur nga koronavirusi, ndërsa mbi 757 mijë persona kanë humbur jetën.
