Pas komentit fyes ndaj qytetarit, nënkryetari i Kuvendit, Myslim Murrizi, ka kërkuar falje publike. Ai është shprehur se ndjen keqardhje për lëndimin që i ka shkaktuar qytetarit.
Ditë më parë, ai nuk u përmbajt ndaj një qytetari, ku ky i fundit e kritikoi në lidhje me një status që kishte bërë për faturat e kripura të udhëtimeve luksoze të ministres së Drejtësisë, Etilda Gjonaj. Ai e quajti qytetarin ndër të tjera “down”.
“Keqardhje për lëndimin qe kam shkaktuar. Kërkoj falje publike për të gjithë të indinjuarit. Ndjesë për termin e përdorur në ‘Facebook’. Ndjesë edhe shoqatës se fermerëve për termin “pjeshkëz””, tha nënkryetari i Kuvendit.
Ndërkohë, ai nuk kurseu akuzat për të gjitha shoqatat, që sipas tij, marrin fonde për këtë kategori të personave me aftësi ndryshe, dhe nuk ofrojnë asnjë ndihmë.
Një ditë më parë, pjesëtarë të shoqërisë civile dhe përfaqësues të fondacionit për trajtimin e fëmijëve që vuajnë nga sindroma Down, zhvilluan një protestë para Kuvendit, ndërsa i kërkuan që të bënte falje publike.
