Një ditë më parë u nda nga jeta parodisti i famshëm i Vlorës, Muhamet Liko. Në moshën 64-vjeçare, Liko humbi jetën në një spital në Itali, pasi kishte shkuar për një kontroll shëndetësor.
Ditën e sotme është mbajtur edhe ceremonia e homazheve, ku miq dhe familjarë nderojnë për herë të fundit Likon në teatrin “Petro Marko” të qytetit të Vlorës.
Vajza e Likos, Alkida, i ka prekur të gjithë me një foto të publikuar në profilin e saj në Facebook, ku shkruan fjalët më të ndjera për të atin.
“O jeta ime, o Dritë o shpirt o dashuri e përjetshme, me helmove zemrën, me more jetën dhe mua. Të Dua pafundësisht shumë.
Idhulli Krenaria ime Forca ime Jeta ime. U prehsh në Paqe o Engjelli im.”- janë fjalët e saj në postim.
Muhamet Liko lindi më 26 Qershor të vitit 1955 në qytetin e Vlorës. Daljen e parë në skenë e pati në vitin 1978, ku u bashkua së bashku me 3 parodistët e tjerë.
Parodistët e Vlorës fituan zemrat e të gjithë shqiptarëve me humorin e tyre brilant të ndërthurur edhe me këngën duke i mbijetuar brezave për vite të tëra.
Katër paraodistët Afrim Agalliu, Agron Hamo, Mane Lumani dhe Muhamet Liko u shfaqën së bashku për herë të fundit vetëm disa ditë më parë në skenën e teatrit ‘Petro Marko”. Liko duartrokiti parodistët e rinj të estradës së re në Vlorë dhe më pas u nis për kontrollin në Itali, por nuk ia doli dot.
Liko mban shumë tituj dhe çmime për artin që ka transmetuar tek njerëzit, ndërsa së fundmi është vlerësuar nga presidenti i Republikës me titullin “Mjeshtër i madh”. Ai la pas dy fëmijë dhe gruan e tij.
