Ish-kryeministri Sali Berisha denoncoi pesë ditë më parë dhunën që një prind ka ushtruar ndaj mësueseve të djalit në një shkollë 9-vjeçare në Lundër të Tiranës.
Drejtoresha e shkollës në një intervistë për “Fax News” ka konfirmuar dhunën, ndërsa shton se ai është liruar nga burgu.
“Prindi bërtiste dhe kishte një ton të lartë të zërit dhe përdorte një fjalor jo-etik. Zotëria shtyu një mësuese që ishte shtatzënë. Njëra prej tyre ishte shtatzënë u futa që të mos dëmtonte atë. Prindi i nxënësit është Bardhi Xixi i cili është liruar nga burgu. Të pranishëm ishin pesë mësuese, mua më ka shtyrë, njërën prej mësueseve e ka goditur, tjetra ishte shtatzënë dhe e kemi larguar. Ngjarja ka ndodhur rreth orës 12:00. Nxënësit e tjerë u terrorizuan pasi ai ishte i dhunshëm”, tha drejtoresha Alma Kaziu.
Ndërkohë, mësuesja shtatzënë është shprehur se kujton vetëm që dikush e ka tërhequr për krahu dhe më pas asgjë nuk mban mend, ndërsa ka thënë se një veprim i tillë mund të kishte qenë dhe fatal për të, pasi mund të humbiste fëmijën e saj.
“Isha dezhurn, dëgjova zhurmën dhe u afrova. Ndërkohë që drejtoresha më tha të largohesha, dëgjova një të qëlluar. Nuk e përmbajta veten, mu errën sytë, ndërkohë jam shtyrë jam përplasur tek muri dhe aty nuk mbaj mend asgjë tjetër. Unë bëra deklaratë, dhe I kam thënë gjërat ashtu siç po I tregoi tani.
Pas incidentit nuk kam pasur asnjë komunikim.
Në momentin e shtytjes më ka kapur ankthi dhe marrja e frymës, nuk mbaj mend nga çfarë ka ndodhur. Gjithë ndihma më ka ardhur nga koleget e mia, ato më kanë dhënë ujë me sheqer”, tha mësuesja.
