Për të qeshur apo për të qarë? Kjo është dilema më e madhe e sportdashësve shqiptarë.
Po me Skënderbeun ç’patën?!
Të gjithë u ndjenë krenarë me suksesin e korçarëve në Europë, pavarësisht se për kë ekip bënin tifo në kampionat.
Por duket se ishte shumë e bukur për të qenë e vërtetë, prandaj nuk zgjati shumë gëzimi.
Po ne shqiptarët nuk i kemi sytë në ballë? Dhe ne kemi Komision Etike dhe Disipline, kemi edhe Federatë që duhet të dënojë trukime e manipulime. Po është më bukur të të bëjë bota shembull.
Nuk ka shumë që numri një i FSHF-së u rizgjodh për të pestën herë dhe radhiste një e nga një sukseset e arritura në 16 vite.
Por nuk u diskutua asnjë dështim, asnjë hetim i bërë për trukime ndeshjesh, asnjë dënim, asnjë shembull. Kaq i pastër ishte për Federatën futbolli në Shqipëri?!
E vërteta është e zezë, Skënderbeu rrezikon 10 vite dënim nga UEFA për ndeshjet e luajtura në kompeticionet europiane, por jo vetëm.
Rreth 40 ndeshje të cilat hetohen janë të kampionatit shqiptar dhe Kupës; e gjitha përgjegjësi e Federatës.
Po kujt Federate?
Kur UEFA përjashtoi Skënderbeun nga Champions League, FSHF u mjaftua me një titull të hequr (edhe ai nuk është hequr tamam, se presim vendimin e CAS).
Institucioni i futbollit nuk ndëshkon dot ekipet për parregullsi, po pse?
Ka konflikt interesi.
Në momentin që presidenti Duka është aksionar në sponsorin kryesorë të korçarëve, duhet të dënojë veten dhe xhepin e tij, gjë që vështirë të ndodhë.
Lëvizja e parë pas publikimit të raportit të UEFA-s ishin kërcënimet me jetë, tipike shqiptare; sinjal i qartë që diçka e keqe trazohej në këtë çorbë të madhe dhe provohet zgjidhja më e thjeshtë, e mbylljes së gojës.
Për ironi të fatit ky raport i përpiluar në detaje, vjen në 7 shkurt; dita e madhe për futbollin shqiptar me rizgjedhje të Armand Dukës president të FSHF-së.
Presidenti i FIFA-s, Gianni Infantino dhe ai i UEFA-s, Aleksandër Ceferin, japin urimet e përzemërta për këtë rizgjedhje dhe FSHF nuk nguron t’i publikojë si suksese.
Me kaq shumë ndeshje të manipuluara në kampionatin shqiptar, shqetësimi nuk ngelet Skënderbeu, apo fati i tij.
Shqetësimi i vërtetë është se rrënohet i gjithë futbolli shqiptar, me aq shumë ekipe të përfshira në këtë hetim.
Rrënohet Federata Shqiptare e Futbollit, bie dhe imazhi i kombëtares kuqezi, që ngelet e vetmja e paprekur deri tani.
Për këtë histori të trishtë skandalesh, fjala e fundit nuk është dhënë akoma. Por vështirë të besohet se fjala që u tha e para të ndryshojë deri në fund.
Eno Leka, TIRANA TODAY
