Mjekët dhe infermierët janë më të ekspozuarit ndaj rrezikut për infektimin me koronavirus. Një infermiere nga Milano ka postuar një foto të saj në Instagram, ku shihen qartë shenjat e nxira të maskës në fytyrën e saj. Italia është renditur pas Kinës referuar numrit të vdekjeve dhe të të prekurve me koronavirus. Ajo shkruan në një postim në rrjetet sociale se është tejet e lodhur.
Infermierja shkruan ndër të tjera se nuk mund të shkojë për të kryer nevojat e saj personale, dhe madje as të pijë ujë, ndërsa qëndron pa reshtur mbi të infektuarit.
“Jam shumë e lodhur fizikisht, sepse masat e mbrojtjes mund të të lëndojnë, këmisha që vesh më bën të djersij pa fund dhe kur e vesh nuk e heq më për më shumë se 6 orë dhe nuk mund të shkoj në banjo apo të pi ujë”, shkruan në postimin e saj infermierja italiane. Por Alessia ka një apel për të gjithë italianët. Ajo u ka kërkuar të gjithë qytetarëve që të qëndrojnë në shtëpi, duke mbrojtur veten dhe të tjerët.
“Ajo që i kërkoj gjithkujt që e lexon këtë postim, është të mos e çoni dëm mundimin tonë, të jini altruistë. Qëndroni në shtëpi se kështu do mbroni ata që janë më të dobët. Ne të rinjtë nuk kemi imunitet ndaj këtij virusi, edhe ne mund të sëmuremi, apo edhe më keq mund ta përçojmë sëmundjen tek të tjerët. Nuk e kam luksin të kthehem në shtëpi për izolim, sepse duhet të jem në punë për të bërë atë që më takon. Bëni edhe ju pjesën tuaj, ua kërkoj si nder”, mbyllet postimi i Alessias
