Kombëtarja 21-vjeçare e Shqipërisë nuk ka ditur të mbrojë avantazhin në “Selmnan Stërmasi” dhe është përmbysur nga Sllovakia me rezultatin 2-3. Kjo ishte sfida e 6-shtë e vlefshme për Europianin 2019, por me këtë humbje kuqezinjtë i kanë thënë lamtumirë shansit për tu pozicionuar në vendin e dytë. Me 6 ndeshje të zhvilluara Shqipëri a U-21 renditet në vend të parafundit të klasifikimit në Grupin 2, në kuotën e 6 pikëve, duke lënë pas vetëm Estoninë në vend të 6-të me 1 pikë.
Ishte Rey Manaj njeriu i ndeshjes për kuqezinjtë e Alban Bushit, pasi me golat e tij i dha dy herë avantazhin Shqipërisë, por që lodhja dhe terreni i vështirë bënë që në fund të linin shumë hapësira dhe të përmbysej gjithçka.
Goli i parë erdhi në fundin e pjesës së parë, ku Çekiçi rikuperon një top mjaft të mirë në mesfushë dhe nis Manajn në kundërsulm. Ky i fundit në kombinim me Cekën futet në zonë dhe mposht portierin sllovak. Vetëm tre minuta nga rifillimi i takimit, përfaqësuesja sllovake ka barazuar shifrat. Ishte Spalek ai që ka rivendosur ekuilibrat, me një gol të shënuar falë një gjuajtje fluturimthi në të 48’.
Është sërish Manaj që sjell golin e avantazhit, pas një shpërthimi në krah të Seferit i cili fiton duelin e shpejtësisë dhe shërben në mënyrë perfekt për bomberin e Interit i cili nuk gabon.
Me 10 minuta nga përfundimi i takimit, pikërisht kur kishin spostuar lojën në gjysmëfushën sllovake, madje me disa raste të shpërdoruara, Shpresat kuqezi janë zënë në befasi, duke pësuar golin e barazimit 2-2, të shënuar nga Dimun në të 80’. Gati të shthurur në minutat e fundit në mbrojtje kuqezinjtë pësojnë golin e tretë, duke i dhënë kështu mundësinë Sllovakisë që të përmbysë rezultatin në 2-3 falë golit të Mraz në të 87’.
