Pedagogia Iris Luarasi ka folur sërish rreth deklaratës së bërë nga ajo disa ditë më parë, ku përmendi 4 emra personazhesh të cilët i kishte ngelur, në kohën kur ishin studentë të saj në universitet.
E ftuar në emisionin “Soiree” në Top Channel, Luarasi sqaroi se çdo gjë është keqkuptuar dhe se ajo e ka thënë me shumë sportivitet pa dashur t’i prishë imazhin askujt.
Sipas saj, peshëngritësi Erkand Qerimaj nuk e ka lënë atë të fliste deri në fund, teksa theksoi se të katërt emrat e përmendur nuk kanë ngelur për rezultatet në mësime, por për çështje mungesash.
“Unë do thoja që ju të katërt në fakt nuk keni qenë ngelësa, por keni qenë studentë shumë të mirë dhe në fund fare unë ju kam vlerësuar me 10-të. Kur po shikoja emisionin në YouTube aty e pashë që shtangisti që kisha përballë nuk më lejonte që të vazhdoja fjalinë time dhe të thoja që nuk kanë ngelur për rezultatet në mësime, kanë ngelur për çështje mungesash. Iku historia, u bë lajm, nuk pati më kohë që të sqarohej. Unë të falenderoj shumë në fakt që më ke thirrur sot për ta sqaruar”, është shprehur pedagogia.
Ajo shton se pas kësaj deklarate që mori dhenë në mediat online, i ka marrë të katërt ish-studentët e saj që sot janë të famshëm në telefon, për t’ju kërkuar falje.
“Ju mora të katërve, përfshirë edhe ty dhe ju kërkova falje sepse nuk e mendoja që një gjë e thënë me aq shumë sportivitet edhe me aq shumë dashuri në fakt pa dashur në mënyrë absolute t’ju prishja imazhin. Ti mendon që kur ke një famë kaq shumë të madhe, saç keni ju të katërt, kjo gjë nuk të bën më përshtypje, sepse mendon se kjo është një gjë që ka ndodhur në të kaluarën dhe që e merr me sportivitet“, sqaroi ajo.
Kujtojmë se një nga emrat e përmendur nga ajo ishte edhe moderatorja e këtij emisioni, Jonida Shehu. Ndërkohë, e vetmja e cila u përgjigj asokohe në lidhje me këtë deklaratë, ishte moderatorja Arbana Osmani, e cila tha se ishte e detyruar t’i linte orët e mësimit me të për shkak të angazhimit në punë.
