Disa njerëz djersitin më shumë se ç’duhet, duke iu kthyer në një makth të vërtetë. Antidjersat e parfumet duket sikur janë një zgjidhje e përkohshme, pasi bluzat sërish do të marrin atë njollën e zakonshme.
Kjo dukuri, e cila për hir të së vërtetës varet nga temperatura e mjedisit, shfaqet në çdo stinë, dhe përkeqësohet zakonisht gjatë verës. Trajtimi i kësaj sëmundjeje mund të jetë lokal, oral, kirurgjikal ose jokirurgjikal.
Por si duhet të veprojmë? Çfarë masash duhet të marrim? Është mjaft e thjeshtë! Për të minimizuar djersitjen (hiperidrozën), këshillohet të përdoret sapun dhe detergjentë që respektojnë pH e lëkurës, të lahen shpesh duart, të bëhet kujdes për plagët e lëkurës sado të vogla qofshin, të shmangen alkooli, duhani, kafeja, erëzat pikante apo çdo veprim e kontakt që stimulon djersitjen. Nëse ndryshimi i dietës, rrobave apo deodorantit nuk ju ndihmon ta largoni djersitjen e tepërt, atëherë flisni me një mjek, shkruan Living.
Djersitja e tepërt ose e quajtur ndryshe si hiperhidroza, që për mjekët, përveçse një sëmundje e lindur, mund të jetë “sinjal alarmi” për çrregullime endokrine, përfshirë këtu sëmundjet e tiroides, sëmundjen e diabetit, e deri edhe sëmundjet malinje. Tek disa pacientë, prodhimi i djersës mund të jetë i shtuar rreth 40 herë mbi vlerat normale. Problemi i hiperhidrozës fillon zakonisht gjatë pubertetit (9-16 vjeç) dhe vazhdon gjithë jetën, me njëfarë ulje të intensitetit, në varësi të gjendjes psiko-fiziologjike të personit.
