Komisioni i Pavarur i Kualifikimit ka shkarkuar nga detyra prokurorin Ramadan Troci, të cilit i janë gjetur shkelje në deklarimin e pasurisë.
Kështu, Troci nuk ka arritur të kalojë Vettingun, pasi janë gjetur disa shkelje në vetdeklarimin e pasurisë. Konkretisht, komisionerët e vetting-ut thanë se, pas sitës së trefishtë të vetting-ut, rezulton se prokurori Troci ka një apartament në pronësi dhe një llogari bankare prej 2.5 milionë lekësh.
Por, KPK-ja shtoi se prokurori ka probleme me pasuritë, përderisa nuk shpjegon dot nëse ka apo jo pjesë takuese në një shtesë pa leje prej 32 metrash katrorë, të ndërtuar nga i ati në Paskuqan. Gjithashtu, KPK-ja mendon se prokurori nuk qartëson kontratën e qirasë të lidhur me një person tjetër, për një banesë në të cilën Troci jeton bashkë me familjen.
Troci është prokuror në Prokurorinë e Përgjithshme, ndërsa ishte kandidat për Këshillin e Lartë të Prokurorisë. Kohë më parë, ai firmosi urdhrin për arrestimin e ish-guvernatorit Ardian Fullani dhe për ish-kreun e Bashkisë së Vlorës, Shpëtim Gjikën.
