Pas ngjarjes së rëndë ku u dhunua gjyqtari Eldorjan Hamiti në Kamëz, Shoqata Bashkimi i Arbitrave të Futbollit Shqiptar ka marrë vendimin për të bojkotuar ndeshjet e futbollit në nivel kombëtar.
“Duke parë që nga java e parë e kampionatit dhe deri në të fundit ne ndjehemi të pasigurtë, sot ne vendosëm të themi: Mjaft! Mjaft më me kërcënime, fyerje e sharje. Mjaft dhe kjo është shumë më serioze dhe e rrezikshme) me dhunë e ç’është më e rëndësishmja, mjaft më me pasiguri për jetën. Njëzëri arbitrat mendojnë se eksperimenti i deritanishëm për largimin e Policisë së Shtetit nga stadiumet e futbollit ka dështuar. Zëvendësimi i tyre me polici private është një dështim tjetër tashmë i konsumuar. Ashtu siç nuk kemi se ç’të presim më edhe nga eksperimenti tjetër i zbatimit të ligjit, i cili ka dështuar plotësisht, përderisa autorët e dhunës janë liruar sot, edhe se pamjet filmike janë shumë të qarta dhe media ka katër ditë qe e ka në qendër të vëmendjes këtë ngjarje”, thuhet në një deklaratë për shtyp.
Shoqata e Arbitrave i kërkon gjithashtu klubeve anëtare në FSHF t’i mirëkuptojnë dhe t’i mbështesin në vendimin që e marrë, kjo sepse vendim sipas tyre është e vetmja rrugë që gara të jetë sa më e vërtetë dhe korrekte.
“Mjaft u eksperimentua. Ne kemi vendosur të mos luajmë me jetën tonë. Kështu nuk do të kthehemi për të gjykuar, deri sa të ndjehemi të sigurtë dhe Policia e Shtetit të kthehet në stadiume dhe autorët e dhunës të ndëshkohen”, thuhet në deklaratën e Shoqatës Bashkimi i Arbitrave të Futbollit Shqiptar.
