Vllaznia U19 nuk ia doli dot të përmbysë humbjen në ndeshjen e parë ndaj moldavëve të Zimbrusë dhe të vijojë më tej aventurën në UEFA Youth League. Djemtë e drejtuar nga Zmijani dhuruan një paraqitje të mirë vetëm në pjesën e parë, ndërsa u shthurën totalisht në të dytën, duke pësuar 3 gola dhe humbur me rezultatin 2-4. Shkodranët e panë veten në disavantazh, që në minutën e 12, por reaguan mirë dhe arritën të përmbysin rezultatin në 2-1, brenda 45 minutave të para.
Gjithsesi, në minutën e 52-të, moldavët barazuan rezultatin dhe ëndrra e kualifikimit u bë thuajse e pamundur për Vllazninë, sepse tashmë i duhej fitore me 3 gola diferencë.
Ky gol solli pështjellim në radhët e djemve shkodranë, të cilët humbën përqendrimin dhe nxorën topin nga rrjeta edhe dy herë të tjera, duke e humbur takimin me rezultatin 2-4. Vllaznia eliminohet kështu nga faza Play Off e UEFA Youth League, me rezultatin final 3-7 dhe me një paraqitje që la shumë për të dëshiruar, edhe pse shorti i vuri përballë një ekip modest.
