Një barazim në “Olimpico” përballë Romës ka mjaftuar që Juventus të shpallet kampion një javë para mbylljes së kampionatit. Bardhezinjtë nuk kanë arritur të fitojnë ndaj ekipit të drejtuar nga Eusebio Di Francesco, por dalin nga kryeqyteti italian si kampionë të Italisë. Po ashtu për të katërtin vit me radhë me trajnerin Massimiliano Allegri në stol “dopjetën” kampionat+kupë.
Roma, që renditet në vendin e tretë dhe do të luajë në Champions League sezonin e ardhshëm, luajti me dhjetë futbollistë në 20 minutat e fundit, pas kartonit të dytë të verdhë të marrë nga Radja Nainggolan.
“Zonja e Vjetër” ka fituar 31 tituj kampionë në Itali, 13 trofe të Kupës së Italisë, 7 Superkupa të Italisë, 2 trofe të Champions League, 3 Kupa UEFA, 1 Kupë Kupash, 2 Superkupa të Europës dhe 2 Kupa Interkontinentale.
Ndërkohë, Napoli ka fituar 2-0 në fushën e Sampdoria duke arritur kuotën e 88 pikëve, një rekord absolut për këtë klub në historinë e Seria A. Vlen për t’u përmendur se ndeshja u ndërpre për tre minuta si pasojë e sharjeve të tifozëve të Sampdoria karshi Napolit.
Golin e parë e shënoi Arkadiusz Milik, 17 minuta para fundit, i shërbyer nga Allan, ndërsa Raul Albiol firmosi golin e dytë, por sido që të shkojnë ndeshjet e fundit, Napoli do ta mbyllë kampionatin në vend të dytë.
