Pasi vendosi të largohet nga Kombëtarja shqiptare, Giani De Biasi ka pasur një moment mjaft të keq në karrierë dhe aktualisht është pa ekip. Alaves në Spanjë, ishte eksperienca më e keqe për trajnerin italian, pasi zgjati vetëm tre muaj. Ndërsa më pas u fol se do të merrte drejtimin e Polonizsë, që në fund në mënyrë të habitshme ata zgjodhën një emër vendas.
Kthesa në minutën e fundit që bëri Polonia, për De Biasin ishte si një shkatërrim dhe ai e ka përjetuar mjaft keq. Në një intervistë për mediat polake, ish-trajneri i Shqipërisë ka folur në lidhje me mosmarrjen e stolit të Polonisë, por nuk ka lënë pa folur edhe për aventurën që ka kaluar në Shqipëri.
Ai është pyetur nga gazetari, nëse aventura me Shqipërinë ka qenë momenti më i mirë në karrierën e tij, ai ka dhënë përgjigjen: “Modenën dhe Torinon i kam ngritur nga Seria B në Seria A, më pas i kam lanë ekipet. Kam qenë në vendin e 13 në elitën e futbollit italian. Më pas kam marrë Shqipërinë si një trajner i formuar dhe jam shokuar kur u binda se si fansat ishin të çmendur pas futbollit. Më kujtonte mua Napolin në Itali. Arritja e Euro 2016 krijoi një valë entuziazmi në të gjithë vendin, njerëzit u çmendën me prezantimin tonë.
“Të punosh me shqiptarët nuk është e lehtë, duhet të kesh humor të mirë, të flasësh gjatë me ta dhe të përkthesh. Ata janë euforikë pas fitoreve dhe duhet t’i kthesh me këmbë në tokë. Ecëm para me djemtë dhe dhuruam një paraqitje të mirë në Francë. Ne ishim duke kaluar grupin. Fitorja me Rumaninë u prit njësoj siç përjetohet fitimi i Kupës së Botës në vendet e tjera”, ka deklaruar fillimisht italiani.
De Biasi ka dhënë detaje dhe në lidhje me largimin nga detyra: “Në kualifikueset e Kupës së Botës na ra një grup shumë i vështirë. Ne nuk luajtëm futboll të keq. Në atë pikë, unë thashë se kam nevojë për sfida të reja, të ndryshoja mjedis dhe vendosëm me Federatën se ishte koha për t’u ndarë.
“Do të shkoja në Shqipëri për pushime, por nuk do të kisha kohë për të pushuar, pasi do të më duhej të jepja autografe dhe të bëja foto. Një kënaqësi e madhe për trajnerin dhe lojtarët, pasi ti e ndjen se i ke dhënë njerëzve lumturi”, ka përfunduar ish-trajneri i Shqipërisë.
