Pas humbjes me Skocinë të gjithë menduan që Panucci është i shkarkuar nga posti i trajnerit të kombëtares shqiptare, por nuk ndodhi kështu. Disa media nxituan të nxjerrin edhe emrat që do ta zëvendësonin, por duket se presidenti i FSHF-së, Armand Duka nuk e ka menduar këtë plan në asnjë moment.
Në një prononcim për mikrofonin e TV Klan, kreu i futbollit shqiptar ka dhënë edhe arsyet pse “votëbesoi” trajnerin Christian Panucci:
“Nuk është koha për vendime të nxituara. Panucci ka të mirat e të këqijat e veta. Nuk kemi luksin të ndërrojmë trajner. Ne jemi skuadër modeste. Që të bëjmë mirë, duhet të jemi të gjithë pozitivë. S’kemi menduar për trajner tjetër, i japim mbështetje maksimale Panuccit.
Eksperimentet u bënë, fituam Ismajlin dhe Uzunin. Kombëtarja e konsoliduar për kualifikueset e Europianit është tashmë në mendjen e stafit. Në takimin e fundit që pata me trajnerin biseduam se si t’i bëjmë më mirë gjërat organizative, sepse anën teknike e ka vetë në dorë vetë Panucci”, u shpreh Duka.
