Presidenti Ilir Meta i është përgjigjur me një ironi ministrit Bushati lidhur me negociatat mes Shqipërisë dhe Greqisë.
Meta ka qenë sot në shkollën “Fan Noli’, në kuadër të Ditës së mësuesit, ndërsa i është përgjigjur edhe këmbënguljes së gazetarëve lidhur me dhënien e autorizimit për Plotfuqishmërinë për marrëveshjen Shqipëri-Greqi.
“Nuk e di nëse Bushati ka qenë te shkolla “Fan Noli”, por ajo na ka mësuar që çdo gjë në kohën e duhur. Faleminderit”, ka qenë kjo përgjigja e shkurtër ironike e Metës, i cili i ka dhënë mesazh Bushatit që autorizimi për Plotfuqishmërinë do të vijë në kohën e duhur.
Kujtojmë se mes presidentit dhe ministrit Bushati ka pasur një përplasje, që detyroi Metën të dalë në një konferencë për shtyp, ku tha se para tij gjithçka është bërë fakt i kryer, pa u konsultuar lidhur me marrëveshjen në fjalë.
