Dhjetëra banorë të lagjes “5 Maji” në Tiranë, të mbështetur nga një përfaqësi e banorëve të Laprakës, po protestojë para Kuvendit që të mos shemben shtëpitë e tyre, të prekura nga projekti i rindërtimit të pallateve. Deputeti Flamur Noka, i pranishëm në protestën e banorëve të “5 Majit” para Kuvendit, u shpreh se në projektin e “5 Majit”, por edhe në Laprakë, ka një bashkëpunim mes Edi Ramës, Erion Veliaj dhe Lulzim Bashës.
“Pas kaq kohësh prishje, pas kaq kohësh duke nxjerrë banorë dhunshëm nga shtëpitë e tyre dhe duke i lënë në mëshirë ta fatit, këta qytetarë nuk kanë kërkuar asgjë më shumë veçse duan që të trajtohen sipas ligjeve në fuqi. Duan të mos nëpërkëmbën, duan të mos hidhen në rrugë dhe të trajtohen si qen, por të trajtohen si qenie njerëzore të denja të këtij vendi. Të paktën gjysmën e trajtimit që Rama iu bëri afganëve të Soros. Kaq kërkojnë qytetarët që janë pa strehë, pa shtëpi, në këtë dimër të acartë. Ajo që është më e rëndë në këtë panoramë dhe që vetë banorët e rrugës “5 Maj” dhe Laprakës, po ju bëj me dije ju është fakti, se në të gjitha këto projekte, tashmë po del hapur në dritën e diellit se ka një bashkërendim dhe bashkëpunim mes Edi Ramës, Erion Veliajt dhe “Lulzim Bravës”. Kishte dilema kur u mbyll çështja e Unazës. Koha vërtetoi që për kokën e Klevis Balliut u lëvizën para pa fund që të mos ishte deputet. Ajo çështje u tradhtua dhe u braktis. Ka pasur shumë pikëpyetje dhe akuza që pas kësaj tradhtie ishte “Brava” me pazaret e tij. Tashmë me masakrën që po bëhet në “5 Maj” dhe në Laprakë është çdo gjë evidente. Rama dhe Veliaj, prishin dhe shkatërrojnë, sepse pazari është që pas kësaj historie është “Lul Brava” me Kapllanat apo Alibeajt e tij të cilët përfitojnë nga këto projekte”, tha Noka.
Banesat e lagjes “5 Maji” preken nga projekti i rindërtimit dhe banorëve pavarësisht se u është thënë që do marrin apartamente në pallatet e ndërtuara, ngrenë hije dyshimi duke theksuar që nuk besojnë se do dëmshpërblehen.
