Deputeti demokrat Flamur Noka e ka cilësuar si sulm të “klanit Xhafa”, procesin gjyqësor të Ervin Salianjit. Me një postim në rrjetet sociale, Noka shkruan se Salianjit i janë vërsulur me procese gjyqësore të montuara. Seanca e parë gjyqësore në Gjykatën e Apelit, për deputetin demokrat Ervin Salianji, për çështjen “Babale”, është shtyrë për në datën 18 korrik. Seanca e parë në Apel nisi me shtyrje, pasi mungonte anëtarja e trupës gjykuese për arsye shëndetësore, si dhe avokatët për shkak se kanë bojkotuar seancat gjyqësore në shenje revolte ndaj hartës së re gjyqësore. I vetmi nga të pandehurit që mbërriti në gjykatë ishte ligjvënësi demokrat, në mbështetje të cilit kishin ardhur dhe një grup deputetësh. Skandali që u pagëzua me nofkën “Babalja”, shpërtheu në maj të 2018.
Ja se çfarë shkruan Noka
Klani Xhafa në sulm kundër deputetit Salianji
Kolegu Ervin Salianji bëri publik investigimin e gazetarit që provonte se vëllai i “rilindasit” Fatmir Xhafa vazhdonte organizimin e trafikut të drogës.
Me procese gjyqësore të montuara në shkallën e parë dhe në apel, vëllazëria e drogës i është vërsulur deputetit të Partisë Demokratike me akuzën se ai u ka dëmtuar imazhin që me “djersën e ballit” e kanë vendosur në Itali e Venezuelë.
Pjesë e planit për t’i mbyllur gojën deputeti Salianji janë gjyqtarë me lidhje miqësore me klanin Xhafa, agjentë të SHISH, dëshmitarë të rremë e mbi këta qëndrojnë dy narkoshtetarët Edi Rama dhe Fatmir Xhafa.
Ndodh edhe kjo, që një i arratisur ka besim te drejtësia.
