Ligji islamik, i njohur si ligji i Sheriatit, shpesh shoqërohet nga kritikët me reagime të ashpra dhe qëndrime të forta. Por një gjyqtare në Malajzi, thotë se roli i saj i jep një mundësi për të mbrojtur gratë në kombin me shumicë myslimane.
Gjyqtarja Nenney Shushaidah kryeson pesë gjykime në ditë dhe mund të dëgjojë deri në 80 raste në javë, raporton BBC.
Malajzia praktikon një formë të moderuar të Islamit, por qëndrimet konservatore janë në rritje dhe përdorimi i ligji të Sheriatit gjithashtu po rritet. Sipas një sistemi ligjor të dyfishtë, mijëra myslimanë e përdorin atë për të zgjidhur çështjet morale dhe familjare.
Ajo jep gjykim për çdo gjë, nga rastet financiare, tek ato që përfshijnë [çiftet e pamartuara myslimane që kapen në situata komprometuese].
Por ajo gjithashtu merret edhe me çështje gjyqësore që kanë të bëjnë me kujdestarinë e fëmijëve dhe rastet e poligamisë. Ajo merret edhe me konceptin mysliman të lejimit të burrave për t’u martuar me katër gra. Kjo martesë është e ligjshme në Malajzi.
Martesa me 4 gra
Gjyqtarja Shushaidah thotë se ka shumë faktorë që ajo shqyrton përpara se të ndodhi një bashkim poligam.
“Çdo rast është kompleks dhe i ndryshëm. Nuk mund ta përgjithësoni ligjin islamik dhe të thoni se favorizon burrat dhe i trajton gratë keq … Unë dua ta korrigjoj këtë ide të gabuar”, tha ajo.
Të gjithë ata që përfshihen në një martesë poligame të propozuar duhet të jenë fizikisht të pranishëm në gjykatë para gjyqtares Shushaidah.
“Unë i dëgjoj të gjitha palët. Madje unë flas edhe me gratë aktuale të burrave nëse ato janë dakord për marrëveshjen. Është e rëndësishme që ata të bien dakord, sepse nëse unë shoh ndonjë shenjë kur gratë nuk janë dakord, atëherë unë nuk u jap të drejtë burrave”, tha ajo.
Më tej gjyqtarja tha: “Unë jam femër dhe unë mund të kuptoj se shumica e grave nuk do ta pëlqejnë këtë ide, por është e lejuar në Islamin dhe gjykatat malajziane kanë miratuar ligje të rrepta për të. Një njeri duhet të ketë arsye shumë të forta për të pasur një martesë tjetër. Ai duhet të tregojë se mund të kujdeset për mirëqenien e gruas së tij të parë, si dhe grave që vijnë pas. Ai nuk lejohet të neglizhojë nevojat e askujt”.
Gjyqtarja Shushaidah shtoi se disa gra mund ta mbështesin idenë. Ajo kujton, për shembull, rastin e një gruaje të sëmurë rëndë që nuk mund të mbante më fëmijë.
“Ajo e donte bashkëshortin e saj dhe donte që unë t’i jepja leje për t’u martuar me një grua të dytë”, tha ajo./Përshtati Tirana Today/
