Emigrantët e fshatit Pogragjë në Kosovë paguajnë banorë që të kujdesen për mirëmbajtjen e fshatit të tyre.
Personi që kujdeset çdo ditë për pastërtinë quhet Fikret Mustafa, punëtor i shoqatës “Pogragja” nga Zvicra. Për punën që bën, ai paguhet nga bashkatdhetarët, të cilët mbledhin para pikërisht për këtë qëllim.
Kjo iniciativë nisi fillimisht si nevojë për t’u kujdesur për varrezat e fshatit. Mirëpo në vitin 2012 u themelua shoqata, e kështu filluan edhe investimet e tjera.
Me punën e palodhshme që bëhet nga punëtorët dhe vetë anëtarët e shoqatës, Muhamed Islami, koordinator i shoqatës thotë që është rritur ndërgjegjësimi i banorëve për ruajtjen e mjedisit.
Për rrjedhojë, fshati i Pogragjë në Gjilan ka arritur të mbajë lumin e pastër dhe të mos ‘pushtohet’ nga mbeturinat.
