Vogëlushi që shihni në foto është vetëm 5 vjeç, por ka lexuar me siguri më shumë libra se shumë të rinj shqiptarë.
Quhet Dionis Senjo dhe është djali i një çifti onkologësh nga Tirana. Dionisi ka plot 2222 ndjekës në faqen e tij në Facebook dhe njihet për inteligjencën e tij.
Në moshën 1-vjeçare, Dionisi ka treguar interes mbi të mësuarit e shkronjave, numrave dhe formave gjeometrike. Gjithashtu, në po këtë moshë, ai ka mësuar emrat e të gjitha kafshëve në shqip dhe në anglisht, si edhe ka mundur të formojë ‘puzzles’ për moshat 4 vjeç.
Dionisi ka mësuar të lexojë dhe të shkruajë numrat dhe shkronjat në shqip dhe në anglisht brenda pak muajsh, ndërsa në moshën 2-vjeçare ka shkruar diktim.
Inteligjenca e vogëlushit i ka lënë prindërit e tij të habitur, ndërsa brenda pak muajsh zbuluan se i biri ka mësuar alfabetin rus në formë të shkruar.
“Ne ia ndaluam sepse kemi menduar se nuk do të jetë e dobishme për të në të ardhmen dhe kështu e orientuam në alfabetin grek që ai e ka mësuar në një pasdite, në të shkruar dhe në të folur. 3 vjeç mund të kryente mbledhje, zbritje me shifra pa fund, kryente veprime matematikore me numrat negativë, ndërsa shumëzimin dhe pjesëtimin jemi munduar ta ndalim t’i mësojë pasi kemi menduar se mund të humbasë interesin në shkollë, por ai arrin t’i llogarisë edhe pse e kemi penguar. Në tabelën e Mendelejevit që shitet në libraritë shqiptare gjeti dy gabime”, shprehen prindërit e Dionisit, shkruan blog.urbanus.al.
Por, gjeniu i vogël vazhdonte të çudiste: brenda një jave Dionisi mësoi numrat greke deri në një miliard, në të njëjtën kohë, ai mund të thotë alfabetin anglisht nga A në Z dhe nga Z në A me të njëjtën shpejtësi.
Në moshën 3-vjeçare, Dionisi filloi të lexojë gjithçka shpejt në gjuhën shqipe. Madje, ai mund të lexonte numra shumë të gjatë, me 40 shifra, në shqip dhe në anglisht.
Po në këtë moshë, ai i njihte të gjithë planetët, shumë yje dhe galaktika. Jo vetëm kaq, po sot ai njeh shumë mirë gjeografinë e botës në hartën memece: njeh çdo kryeqytet, flamuj, lumenj, male, dete, monedha, të gjitha elementet periodike, anatominë njerëzore, të gjitha llojet e dinozaurëve.
Dionisi nuk i mëson gjërat mekanikisht, por logjikisht, ndërsa deri më tani ai ka lexuar 700 libra, ndër të cilët 135 në anglisht.
