Gjermania ka bërë të pamundurën përballë Suedisë, duke përmbysur rezultatin edhe pse me 10 lojtarë. Kampionët e botës në fuqi kanë zhvilluar një ndeshje fantastike, ku përmbysin rezultatin nga 0-1 në 2-1 në sekondat e fundit me Toni Kroos. Dukej sikur gjermanët ishin pranë eliminimit por tani gjithçka është në lojë dhe kampionët rikthehen në garë.
Djemtë e Joachim Low kanë zhvilluar një lojë fantastike nga minuta e parë me raste të shumta shënimi, por që gabojnë në momentin e fundit kur topi duhej dërguar në rrjetë. Ndërkohë Suedia përdor kundërsulmin dhe shfaqet rrezikshëm në çdo rast. Pikërisht me kundërsulm vjen edhe goli i nordikëve, ku një gabim i Kroos i dha mundësinë Toivonen të shënonte një gol spektakolar.
Në pjesën e dytë gjermanët kthehen me vizion të qartë, të përmbysin ndeshjen dhe është Reus që rikthen shpresën në minutën e 48’. “Panzerat” nuk e ulin ritmin, sulmojnë, krijojnë dhe kërkojnë golin por suedezët bëhen të pathyeshëm në mbrojtje. Boateng “tradhton” ekipin në minutën e 82’ pasi ndëshkohet me kartonin e dytë të verdhë dhe detyrohet të lejë fushën.
Me daljen me karton të kuq të Boateng situata përkeqësohet, gjithsesi gjermanët vazhdojnë të sulmojnë deri te fryma e fundit dhe një goditje dënimi e ekzekutuar nga Toni Kroos i ka dhënë tre pikët kampionëve.
