Një tjetër këshilltar i kryeministrit Rama është emëruar në një detyrë të rëndësishme. Bëhet fjalë për Artur Metanin, që është përzgjedhur për të drejtuar Avokatin e Shtetit, pas shkarkimit të Alma Hiçkës. Propozimi është bërë nga ministrja e Drejtësisë, Etilda Gjonaj.
https://tiranatoday.com/rama-i-pergjigjet-kazanit-mos-nxirrni-brockulla-per-almen/
Alma Hiçka ka përfaqësuar interesat e qeverisë shqiptare në disa gjyqe ndërkombëtare, ndërkohë që opozita e ka atakuar disa herë figurën e saj, si në konflikt interesi. Sipas Partisë Demokratike, bashkëshorti i saj ishte avokat i CEZ, ndërkohë që Hiçka përfaqësonte qeverinë shqiptare në këtë gjyq.
Në vitet 2004-2012, Metani ka qenë këshilltar i presidentit Alfred Moisiu dhe Bamir Topi për çështjet e drejtësisë. Ai është me profesion jurist dhe konsiderohet një prej kandidatëve për të drejtuar Byronë e Hetimit, institucion që pritet të krijohet në kuadër të Reformës në Drejtësi.
Artur Metani është gjithashtu vëllai i deputetes së PS, Eglantina Gjermani.
Mësohet se sot Metani është paraqitur në Komisionin e Ligjeve, ku kolegët e kanë uruar për postin e ri, edhe pse ende nuk ishte bërë publik lajmi për shkarkimin dhe emërimin e ri.
