Ministrja e Arsimit dhe Sportit, Evis Kushi, është shprehur entuziaste për suksesin dhe rezultatet e jashtëzakonshme që po marrin sportistët shqiptarë në arenën ndërkombëtare.
Në një status në rrjetet sociale ku ka përgëzuar edhe peshëngritësin e ri Ertjan Kofsha për tre medaljet e arit, ministrja Kushi shprehet krenare që sporti shqiptar si asnjëherë më parë, po triumfon në garat ndërkombëtare.
“Medaljet e shumta të sportistëve tanë në disiplina të ndryshme dëshmojnë që Shqipëria, edhe pse vend i vogël, ka vlera të larta sportive dhe talente të rralla.
Suksesi më i fundit është i sportistit Ertjan Kofsha, peshëngritësit nga Shtërmeni, i cili i shtoi një tjetër kampion Shqipërisë me 3 medalje të arta në Kampionatin Evropian të Peshëngritjes për moshat U-15 dhe U-17, që po zhvillohet në Raszyn të Polonisë”, shkruan Znj. Kushi.
Më tej ajo shton se:
“Si ministre e sportit, këto rezultate më bëjnë jo vetëm krenare, por më motivojnë për të punuar edhe më shumë për zhvillimin e mëtejshëm të sportit, si dhe mbështetjen, trajtimin dhe vlerësimin e sportistëve me dinjitet.
Suksese Ertjanit dhe të gjithë sportistëve që lartësojnë flamurin shqiptar kudo në botë!”.
