Një tërmet ka goditur kryeqytetin italian mëngjesin e sotëm.
Sipas mediave fqinje, lëkundjet ishin të një magnitude 3.3 ballë dhe u ndien në orën 5:03 të mëngjesit. Epiqendra e tij ishte në Fonte Nuova, një qytet i vogël rreth 10 milje larg kryeqytetit.
Raportohet se tërmeti ka shkaktuar panik tek banorët e kësaj zone, ndërsa shumë prej tyre kanë lënë banesat dhe kanë qëndruar për disa orë në rrugë.
Banorët raportuan se kishin dëgjuar një zhurmë të thellë për rreth 30 sekonda, para se të fillonte lëkundja duke shkaktuar panik.
“Kishim frikë. Ky është një moment i vështirë. Me tërmetin që ra s’do jemi më në gjendje të flemë”, tha një dëshmitar anonim.
Tërmeti regjistrohet në një kohë të tillë kur i gjithë vendi gjendet në izolim për shkak të përhapjes së koronavirusit. Italia është një nga vendet që e ka vuajtur më shumë këtë pandemi, duke shënuar me mijëra viktima.
