Futbolli grek rrezikon që të marrë një dënim drastik nga FIFA dhe këtu bëhet fjalë edhe për kombëtaren. I tillë ka qenë raporti i dërguar në zyrat e FIFAs në Zyrih nga mbikëqyrësi i tyre në Greqi, ku kërkonte pezullimin pa afat të Greqisë nga anëtare e shtëpisë më të madhe të futbollit. Ky vendim vjen pas futjes në fushë të presidentit të PAOK-ut me pistoletë në fushën e lojës.
Por një shqiptarë ka dalë në mbrojtje të Greqisë dhe ka marrë në dorë fatet e futbollit grek. Shqiptari që punon në FIFA, Eduard Dervishaj i ka dhënë një dorë futbollit të shtetit fqinj, duke u treguar rrugën sesi ta largojnë dhunën dhe të marrin masat për mbarëvajtjen dhe funksionimin normal të garës. Ngjarja që ndodhi në Selanik në ndeshjen PAOK-AEK ka tronditur botën e futbollit dhe sigurisht që FIFA i ka dhënë një rëndësi të veçantë.
MBLEDHJA- Futbolli grek është përballur me rrezikun e përjashtimit pa afat nga gjithë veprimtaritë ndërkombëtare; dhe jo vetëm klubet, por edhe ekipet kombëtare. “Propozojmë pezullimin e menjëhershëm të statusit të anëtarit të FIFA-s për federatën greke të futbollit”, ka qenë propozimi që mbikëqyrësi i federatës greke nga ana e FIFA-s, austriaku Herbert Hubel, i ka dërguar qeverisë së futbollit botëror me seli në Zyrih. Në një mbledhje dramatike zhvilluar të enjten në selinë e EPOs (federatës greke të futbollit), ka asistuar edhe i dërguari i komisionit mbikëqyrës të FIFA-s, shqiptari Eduard Dervishaj.
Dervishaj, i cili ka qenë diametralisht kundër përjashtimit të futbollit grek. Duke e marrë fjalën në mbledhjen e të enjtes, ai ka deklaruar (sipas njoftimit të publikuar nga EPO): “Prioriteti kryesor është të përfundojë kampionati. Ekziston rreziku për imazhin e futbollit grek dhe europian. Dua të punojmë së bashku, të jemi të ashpër dhe të dërgojmë mesazhin se po marrim masa kundër dhunës. Nevojiten veprime. Mbështesim dhe kemi besim të plotë te presidenti i EPO-s dhe punën e tij. Kërkojmë që njëlloj ta mbështesë dhe të veprojë bashkë me të, i gjithë Komiteti Ekzekutiv i federatës, shkruan Panorama Sport.
Kërkojmë mbështetjen edhe nga futbolli i profesionit. Duhet që Superliga të përfundojë normalisht dhe të shohim menjëherë akte dhe vendime nga organet gjyqësore. Të shohim se po bëhet luftë kundër dhunës”, shkruhet në lajmin e publikuar nga “tribunanews”. Në këtë mënyrë, një shqiptar i ka ardhur në ndihmë Greqisë duke i dhënë në dorë që gjërat të nisin të funksionojnë ashtu siç duhet dhe t’i rikthehen normalitetit.
