Mediat greke kanë raportuar për një tjetër kërcënim ndaj ministrit të Jashtëm grek, Kotzias. E përditshmja greke “Ta Nea” bëri të ditur se këtë herë ministrit i është dërguar një zarf dhe në brendësi të tij ishte futur plumb.
Zarfi është dërguar në ambientet e Ministrisë së Jashtme greke, ku përveç plumbit kishte dhe një letër, përmbajtja e së cilës i referohej negociatave që po zhvillohen midis Greqisë dhe Maqedonisë.
Sipas medias greke, bëhet fjalë për një plumb të një mitralozi kunderajror dhe bashkë me letrën i janë dërguar shërbimeve të sigurisë për të vijuar hetimet.
Kjo është hera e tretë që ministri i Jashtëm grek, Nikos Kotzias merr një kërcënim dhe të tria këto i janë dërguar në godinën e institucionit që ai drejton.
E para ishte një letër ku shkruhej se “kemi tre plumba për ty” dhe se çdo njeri prej plumbave i përkiste çdo pjese të hapësirës gjeografike që quhet Maqedoni.
Më pas mbërriti një tjetër letër me përmbajtje ofenduese për vetë ministrin, por edhe për 300 deputetët, ku ndër të tjera thuhej se “parlamentin duhej ta merrte në kontroll ushtria”. TIRANA TODAY
