Nga: Ervis Iljazaj
Opozita dje bëri me dije detyrat e qeverisë tranzitore dhe qëllimet e saj. Në shumicën e pikave ishin çështje teknike, të bazuara kryesisht tek objektivi kryesor i zhvillimit të zgjedhjeve të lira dhe të ndershme. Sigurisht që kjo është beteja kryesore e opozitës, kauza për zgjedhje të lira dhe të ndershme, për të cilën u detyrua të digjte mandatet.
Në këtë kuptim, qeveria tranzitore me të drejtë shihet si e vetmja mundësi për të zhvilluar njëherë e përgjithmonë zgjedhje të lira dhe të pakontestuara. Megjithatë, një objektiv i tillë nuk arrihet vetëm me rritjen e sanksioneve penale për ata që trafikojnë votën, edhe për faktin se sanksione të tilla ekzistojnë në Kodin Penal të Shqipërisë dhe fenomeni i shitblerjes së votave ekziston ende.
Për të arritur objektivin e zgjedhjeve të lira dhe të ndershme, nuk mjafton vetëm ndërhyrja në Kodin Zgjedhor apo atë Penal, sepse ky fenomen është një fenomen i gjerë, kulturor dhe strukturor, që lidhet me disa hallka të rëndësishme të shtetit shqiptar, që edhe pse e ka për detyrë të sigurojë votën e lirë, nuk e ka kryer deri në fund atë.
Prandaj, qeveria tranzitore duhet të ketë si synim realizimin e disa reformave që lidhen direkt me të drejtën themelore në një demokraci, atë të votës.
Në radhë të parë, qeveria tranzitore duhet të depolitizojë Policinë e Shtetit. Një nga hallkat më të dobëta të sigurisë së votës, është padyshim politizimi i Policisë së Shtetit, kryesisht drejtuesve të saj. Nëse votat në Shqipëri blihen në presionin e parasë, apo të grupeve kriminale, ashtu sikurse pretendon opozita dhe ashtu sikurse kanë treguar përgjimet që janë bërë publike, një fenomen i tillë nuk mund të ndodhë pa tolerimin e Policisë së Shtetit. Në këtë kuptim, emërimi i drejtorëve të Policisë jo të politizuar, por ekspert dhe larg lidhjeve partiake, është një kusht i domosdoshëm për të siguruar votën e shqiptarëve.
Në radhë të dytë, është garantimi i zbatimit të Reformës në Drejtësi pa ndikimin e një qeverie politike. Dyshimet se kjo reformë po zbatohet nën ndikimin e kësaj mazhorance, gjithmonë e më shumë po rriten. Kështu që, garantimi i zbatimit të saj në kushte neutrale nëpërmjet qeverisë tranzitore është domosdoshmëri. Edhe për faktin se, nuk do të mund të ketë asnjëherë votë të lirë, nëse nuk kemi një drejtësi të pavarur. Drejtësia e pavarur është një nga mjetet kryesore, në mos kryesori për të evituar çdo fenomen të shitblerjes së votave.
Në radhë të tretë, qeveria tranzitore duhet t’i japë fund njëherë e përgjithmonë administratës publike partiake. Jo vetëm se në këtë mënyrë kemi ndërtuar një administratë jo efikase, por sepse shumica e drejtorëve të kësaj administrate më shumë sesa t’u shërbejë qytetarëve dhe ekonomisë shqiptare, është totalisht në funksion të mbledhjes së votave të partisë në pushtet nëpërmjet vendeve të punës, apo nëpërmjet instrumenteve të pushtetit dhe financiar që ka në dorë. Një administratë e tillë është një nga sëmundjet më të mëdha të shtetit shqiptar përgjatë 30 viteve tranzicion.
Në radhë të katërt, qeveria tranzitore duhet të zotohet për një nga objektivat kryesorë të Shqipërisë dhe shqiptarëve, atë të hapjes së negociatave me Bashkimin Europian. Me të gjitha gjasat, hapja e negociatave nuk do të ndodhë as këtë qershor dhe kjo do të ketë pasoja të rënda për vazhdimësinë e këtij procesi. Fakti që Europa ndodhet në një kontekst jo të favorshëm drejt zgjerimit, e bën rrugën e Shqipërisë drejt saj edhe më të vështirë. Në këtë kuptim, duhet një sforco ekstra, duhet një marrëveshje midis palëve politike për këtë synim, që mund të arrihet nëpërmjet qeverisë tranzitore.
Dhe së fundmi, qeveria tranzitore dhe mbështetja e gjerë politike që do të ketë, duhet t’u kthejë të drejtën qytetarëve për të zgjedhur përfaqësuesit e tyre, nëpërmjet një sistemi zgjedhor që e garanton atë. Po ashtu, ajo duhet ta sigurojë ndërtimin e një mekanizmi efikas të financimit dhe kontrollit të financimit të partive politike, i cili është një nga problematikat kryesore, shkak i të gjitha të këqijave që ka sistemi politik shqiptar në këtë moment./ Gazeta Liberale
