“Një komb, dy shtete dhe fare pak ndryshim. Me Shqipërinë luajnë shumë lojtarë nga Kosova dhe e kundërta. Megjithatë, kur u largova nga Kosova u fol shumë.” Qendërmbrojtësi i kombëtares shqiptare, Ardian Ismajli tashmë ka fituar vendin tek kuqezinjtë dhe është rikthyer të flasë për eksperiencën që kishte në dy ndeshjet e para që u grumbullua.
Ai tashmë është rikthyer te klubi i tij, Hajdu Split, megjithatë ai nuk e ndjen lodhjen prej kombëtares. “Jam gati për takimin ndaj Slaven Belupos. Duhet ta fitojmë këtë ndeshje. Do të vendos trajneri nëse luaj apo jo. Për sa i përket të ardhmes jam i përqendruar te ekipi im dhe të grumbullojmë sa më shumë pikë”, u shprehet mbrojtësi fillimisht.
Ai gjithashtu tregon edhe për jetën e tij në Split, por edhe për sfidën ndaj Uellsit, ku komenton sfidën me Gareth Bale. Futbollisti ka folur për “Slobodnadalmacija”, ku pranon se komunikon në anglisht, por kupton edhe kroatisht. “E futëm në xhep Bale dhe jam i lumtur. Kam luajtur mirë. Këto janë momentet më të mira të karrierës sime. Falënderoj Zotin për durimin. Besimi më ndihmoi të përkushtohem dhe punoj për periudhën e vështirë ku nuk isha as në pankinë. Kur erdhi trajneri Vuliç gjërat ndryshuan dhe më dha besim. Panucci ishte ai që insistoi që të zgjidhja Shqipërinë”, shprehet 22 vjeçari.
Nuk mund të mungonte as pyetja për largimin nga Kosova. “Një komb, dy shtete dhe fare pak ndryshim. Me Shqipërinë luajnë shumë lojtarë nga Kosova dhe e kundërta. Megjithatë, kur u largova nga Kosova u fol shumë. Panucci insistoi shumë për të më bindur. Isha kapiteni i U-21 të Kosovës në barazimin historik 0-0 kundër Gjermanisë, ndeshje e luajtur në Mitrovicë, por nuk më llogariste kush për ekipin përfaqësues. Çdokush ka preferencat e tij dhe Panucci më donte mua në ekip. Ai kishte informacion të plotë për mua.”
