Nga sot, 695 mijë pensionistë kanë nisur që të marrin shpërblimin për festat e fundvitit. Astrit Hado, drejtor i Institutit të Sigurimeve Shoqërore i ftuar në “Sot live në Shqipëri”, është shprehur se shpërblimi do të jepet në të njëjtën ditë që do të ndahet dhe pensioni, dhe mund ta tërheqin brenda 3 viteve. Për rrjedhojë, nuk kanë nevojë të rrinë në radhë.
“Sivjet bonusi i Vitit të Ri ka nisur që në datën 2 dhjetor, bashkë me pensionin. Nuk ka arsye për të pasur radhë, nuk ka më grafik siç kanë qenë më parë. Një pensionist që e ka në datën 10 pensionin, s’ka pse shkon në datën 2 të marrë 5 mijë lekëshin, por të shkojë kur ka ditën e pensionit.
Shpërblimi nuk digjet, nuk kanë pse shpejtojnë se nuk e humbasin, ky bonus u zgjat deri në 3 vjet. Janë rreth 33 mijë veta që e kanë marrë dje pensionin dhe ata mund ta marrim kur të duan, vetëm këto mund të jenë në radhë”, tha Hado.
Nga sot do të lëvrohet bonusi i fundvitit për mbi 695 mijë pensionistë në mbarë vendin prej 5000 mijë lekësh. Ndërsa për 66 mijë pensionistë, që kanë pensione invaliditeti do të akordohen edhe plus 6000 mijë lekë të tjera, para që shkojnë në total 11000 lekë. Vendimin e qeverisë e bëri të ditur kryeministri Edi Rama një ditë më parë, gjatë një deklarate për gazetarët, ndërsa tha se paketa në total do të jetë prej 4.3 miliardë lekësh të reja.
