Ka nisur seanca gjyqësore për 4 deputetët e Vetëvendosjes, Albin Kurti, Donika Kadaj-Bujupi, Albulena Haxhiu dhe Faton Topalli, të cilët akuzohen për hedhjen e gazit lotsjellës në Kuvend.
Në këtë seancë janë thirrur për të dëshmuar 4 dëshmitarë, konkretisht deputetët Naser Osmani e Armend Zemaj dhe Bekim Haxhiu, si dhe kreu i Kuvendit Kadri Veseli.
Megjithatë, në gjykatë nuk janë paraqitur Veseli dhe Zemaj për të dëshmuar lidhur me ngjarjen e prillit të vitit të kaluar.
Ndërkohë, në seancën e mëparshme kanë dhënë dëshminë e tyre deputetët e PDK-së, Flora Brovina dhe Blerta Deliu-Kodra, të cilat cilësohen edhe si palë e dëmtuar.
Në dëshminë e saj, Brovina nuk ka identifikuar asnjë nga deputetët që ka hedhur gaz lotsjellës, por vetëm ka deklaruar se është hedhur gaz lotsjellës. Nga ana tjetër, deputetja Deliu-Kodra kishte specifikuar se ishte deputeti Albin Kurti ai që e ka hedhur gazin lotsjellës në sallën e Kuvendit të Kosovës.
Këtë gjë e ka pohuar edhe deputeti Nuredin Ibish, ndërsa nënkryetari i Kuvendit, Xhavit Haliti nuk e ka përmendur asnjërin nga deputetët që akuzohen, por ka thënë se hedhja e gazit lotjsellës në Kuvend ka qenë akt i opozitës.
