Ka nisur sot procesi i zhvillimit të zgjedhjeve parlamentare, në të cilat shqiptarët do të vendosin për 140 deputetët e rinj të Kuvendit, mes një gare ku marrin pjesë 18 parti politike.
Problemet e para në qendrat e votimeve, janë shfaqur që në fillim të procesit të votimit.
Në Kamëz në një qendër votimi mungojnë komisionerët e PD dhe të PR. Në Qendrën e Votimit 15-69/1 në Kamëz nuk ka nisur ende procesi i votimit.
Qyteti i Durrësit e ka nisur me probleme procesin e zgjedhjeve.
Në QV 96/1, në lagjen 8 nuk ka nisur ende procesi i votimit, për shkak të problemit me emrin e komisionerit të PD, i cili figuron ndryshe në dokumente. Pritet të sqarohet situata.
Ndërkohë që në qendrën e votimit nr 1460-02, lagjia numër 3, mungojnë 200 fletë votimi.
Për mangësinë në materiale po kërkohet anullimi i procesi i votimit pasi një gjëndje e tillë nuk është e zakontë. Nuk bëhet ende e ditur nëse kjo është një mungesë që nga KQZ-ja apo fletët e votimit janë vjedhur.
Në Peshkopi, votimi nuk ka nisur në orarin zyrtar në disa qendra. Bëhet fjalë për, QV 1139/1, e cila ende nuk ka hapur dyert për votuesit.
Në Pukë në QV 0392 nuk ka filluar akoma votimi, dhe shkak është bërë një kuti e çarë.
