Interi më në fund ka marrë fitoren e parë për këtë sezon edhe pse përballë Bolognas kishte disa mungesa mjaft të rëndësishme. Radja Nainggolan ishte lojtari më i rëndësishëm që u afrua në këtë merkato dhe këtë belgu e vërtetoi sot, pasi debutoi me gol. Më pas për zikaltërit ishte Candreva dhe Perisic që vulosën fitoren 0-3.
Ndeshjen të besuarit e Spallettit me kapitenin që i ndiqte nga tribuna e nisën mjaft mirë dhe në sulm, por mungonte goditja e fundit. E njëjta gjë ndodhi në 45’ minutat e para, ku zikaltërit kontrolluan ndeshjen, por mbrojtja e Bolognas ishte e pathyeshme.
Do të duhej të vinte minuta e 67’, kur Nainggolan mori një top në hyrje të zonës nga ana e Politanos dhe pasi e stopoi, e gjuajti për ta dërguar në rrjetën e portierit Skorupski, duke kaluar në avantazh zikaltrit.
Vetëm 3 minuta në fushën e lojës dhe Candreva ka shënuar golin e dytë për Interin e Spallettit. Një gol që ka vulosur fitoren e parë për këtë sezon dhe tre pikët e para për Interin. Një gabim në mesfushë nga lojtarët e Bolognas bëri që Brozovic të niste një kundërsulm të shpejtë dhe Candreva e kthen në gol. Italiani u përfol shumë për një largim gjatë kësaj merkatoje, por atë nuk e bindi asnjë nga destinacionet e ofruara.
Rezultati final u vendos në minutën e 85-të, kur Ivan Perisiç u shërbye në zonë dhe pasi dribloi një mbrojtës kundërshtar, dërgoi për herë të tretë topin në portën e Bolognës dhe vulosi suksesin e parë sezonal të Interit.
