Biznesmeni turk Faruk Fatih Ozer fshihet në Shqipëri, dhe këtë detaj e ka dhënë Ministri i Brendshëm turk. Ministri i Brendshëm turk, Suleyman Soyl ka përcjell një lajm shpresëdhënës, teksa konfirmon se kanë neutralizuar zonën ku ndodhet biznesmeni. Ai është i bindur se është çështje kohe që ai të kapet.
Policia ka bërë të mundur neutralizimin e zonës ku ndodhet themeluesi i kriptomonedhës “Thodex”, Faruk Fatih Ozer.
Ministri ka thënë se janë në kontakt edhe me vendet e tjera, por ata janë të bindur se ku ndodhet ai.
“E dimë që është në Shqipëri. Megjithatë po mbajmë në kontakt edhe vendet e tjera. E dimë se ku është dhe do shkojmë aty. Është çështje kohe”, tha Ministri i Brendshëm turk.
Sipas mediave turke, ministri është shprehur se ka pasur zhvillime të rëndësishme, dhe se vendndodhja e themeluesit të “Thodex” nuk ishte më sekret për Turqinë.
27-vjeçari Ozer është person i shpallur në kërkim ndërkombëtar nga autoritetet policore turke, dhe nga Sekretariati i Përgjithshëm i Interpolit në Lyon, pasi rezulton i dyshuar për mashtrim në shtetin turk nëpërmjet valutës elektronike bitcoin që kap vlerën rreth 2 miliardë dollarë.
Faruk Ozer rezulton të jetë futur në Shqipëri nga pika e kalimit kufitar të Rinasit më 20 prill të këtij viti, ndërkohë që kanë dalë dhe pamje filmike nga momenti kur ai është akomoduar në një prej hoteleve të kryeqytetit, nga një shtetas shqiptar, i cili ka deklaruar se nuk ishte në dijeni të veprës penale që kishte kryer biznesmeni turk. /TIRANA TODAY
