Deputeti i Bindjes Demokratike, Andi Përmeti shprehet se vendosja e notës mesatare për në shkollë të lartë, është një shkelje e të drejtave të njeriut.
Gjatë fjalës së tij në foltoren e Kuvendit, Përmeti tha se ky vendim i lë të rinjtë shqiptarë pa punë dhe shton se, është e padrejtë që ky vendim doli vetëm 2 javë para Maturës.
Më tej, deputeti ngre një sërë pyetjesh, mes të cilave ai pyet nëse kjo është një praktikë ndërkombëtare apo nëse është diskutuar me grupin e interesave.
Deklarata e tij:
Pjesa më e madhe e shqiptarëve nuk do t’ia dijë aq për Ramën apo për Bashën. Askush nuk do t’ia dijë nëse 2020 do e gjejë Metën president apo do të jetë në burg. Shqiptarëve iu intereson ekonomia dhe jo sa herë zihen dhe duhen këta të tre.
Bëhet fjalë për një vendim për notë mesatare për të shkuar në Bachelor. Ky vendim lë të rinjtë shqiptarë pa punë. E para pse e lini rininë pa shkollë? E dyta, a është një praktikë ndërkombëtare? A e keni diskutuar me grupet e interesave? A nuk është shkelje e të drejtave të njeriut që një nxënës që s’ka këtë notë mesatare të mos hyjë në shkollë të lartë. Si mundet që qeveria të hyjë në gjithçka. Si e nxorët këtë vendim vetëm 2 javë përpara Maturës?
