Unioni i Gjyqtarëve të Shqipërisë dhe Shoqata Kombëtare e Gjyqtarëve të Shqipërisë ka reaguar pas konstituimit të Këshillit të Lartë Gjyqësor dhe Këshillit të Lartë të Prokurorisë. Në një deklaratë, ky institucion përshëndet dhe u uron suksese drejtuesve dhe anëtarëve, ndërsa shton se ka ndjekur me vëmendje të gjithë procesin e konstituimit të organeve të reja të drejtësisë dhe për këtë shpreh mbështetjen për garantimin e zbatimit të ligjit dhe ruajtjes së të drejtave të njeriut.
“Unioni i Gjyqtareve të Shqipërisë dhe Shoqata Kombëtare e Gjyqtarëve të Shqipërisë kanë ndjekur me shumë vëmendje zhvillimet e fundit, që kanë lidhje me procesin e reformës në drejtësi dhe konkretisht ngritjen e organeve të reja Këshillit të Lartë Gjyqësor dhe Këshillit të Lartë të Prokurorisë.
UGJSH dhe SHKGJSH gjejnë rastin sot të përshëndesin konstituimin e KLGJ-së si dhe zgjedhjen e drejtuesve të KLGJ, duke Ju uruar të gjithë anëtarëve suksese në kryerjen e kësaj detyre kaq të rëndësishme për mbarëvajtjen e sistemit gjyqësor në veçanti dhe forcimin e sundimit të ligjit dhe shtetit të së drejtës në vend!
Që nga dita e themelimit të tyre UGJSH dhe SHKGJSH nuk kanë rreshtuar se theksuari se, mirëpresin dhe inkurajojnë çdo reformë në sistemin e drejtësisë, e cila bazohet në respektimin dhe mbrojtjen e parimeve dhe të drejtave themelore të njeriut dhe ka për qëllim forcimin e besimit të publikut tek sistemi gjyqësor, rritjen e cilësisë e pavarësisë së vendim-marrjes në gjykime dhe forcimin e parimeve themelore të funksionimit të shtetit ligjor dhe demokracisë ne vend.
Së fundmi, UGJSH dhe SHKGJSH dëshirojnë të theksojnë edhe një herë angazhimin e tyre maksimal për të bashkëpunuar me organet e reja të qeverisjes së pushtetit gjyqësor, në mbrojtje të parimeve kushtetuese të ndarjes së pushteteve, pavarësisë së gjykatave, garantimit të të drejtave dhe lirive të gjyqtarëve në Republikën e Shqipërisë si dhe luftën pa kompromis ndaj çdo fenomeni negativ të vërejtur në radhët e punonjësve të sistemit të drejtësisë!”, thuhet në deklaratë.
