Kryeparlamentari, njëherësh president i zgjedhur, Ilir Meta nga Lezha, ku vizitoi kryeplakun e dhunuar të fshatit Rraboshtë, ka tensionuar së tepërmi situatën politike në vend, teksa ka lëshuar deklaratën bombë, se do të armatosë popullin për të luftuar kriminelët që dhunojnë në emër të politikës.
“Unë do të armatos popullin nëse policia nuk i lidh këta zagarë që dhunojnë” , tha ai gjatë takimit me familjarët e të dhunuarit.
Meta e dënoi rastin sot pas përfundimit të seancës plenare të Kuvendit gjatë një prononcimi për mediet.
Pas denoncimit nga Meta, Policia e Lezhës raportoi ngjarjen e ndodhur mbrëmjen e së premtes, ku u bë e e ditur se, mbrëmë rreth orës 21:00, tre persona të maskuar kanë dhunuar kryeplakun e fshatit Raboshtë, Gjovalin Gjini, duke e goditur atë me sende të forta. Autorët janë larguar në drejtim të paditur dhe policia po punon për kapjen e tyre, ndërsa i dhunuari gjendet jashtë rrezikut për jetën.
