Avokat Spartak Ngjela tha se kryeministri Edi Rama duhet që të japë dorëheqjen. I ftuar në rubrikën “Opinion” në News24, Ngjela deklaroi se kryeministri që nuk e gjen dot mundësinë për zgjidhjen e ngërçit për tarifën në rrugën e kombit të jepë dorëheqjen.
“Nuk ka kryeministër që thotë s’kam mundësi. Kryeministri që nuk gjen dot mundësinë jep dorëheqjen në botë. Nuk i thotë se bëj dot, i thotë vetes dhe jep dorëheqjen. Keni kryeministër një mësues vizatimi. E dini apo jo? E dini çdo të thotë në shekullin e 21-të ku ekonomia e tregut dhe ligji janë në funksion maksimal, ju keni vënë kryeministër një mësues vizatimi. E kuptoni ku jeni. Si u bë kryeministër me leje ndërtimi. Ky duhet të ikë një orë e më parë”, u deklaroi Ngjela.
Gjithashtu, avokati ka folur për situatën e krijuar pas protestës në “Rrugën e Kombit” dhe arrestimit të protestuesve. Ngjela tha se shteti është në krizë, sepse Perëndimi ka ndaluar financimet për shkak se nuk po bëhen reformat. Ai i mëshoi sërish idesë se tarifimi nga koncesionari duhet të bëhet kur është bërë rruga nga koncesionari.
“Mendimi im është që shteti është në krizë. Është në krizë sepse këta spo bëjnë dot reformat. Perëndimi i ka ndaluar financimet. Sepse në momentin që hapen negociatat, nisin dhe financimet. Reforma nuk bëhet sepse kap këta. Çfarë presin ndonjë luftë botërore të shpëtojnë nga reformat? Një ndërtim me koncesion varet tek investimi. Nëse kam investuar normalisht do kërkoj të marr fitimin. Një koncesion i një miniere merret nga prodhimi i një miniere. Ky është një investim i bërë me paratë e shqiptarëve. Nuk është pak se është 1 miliard e ca, sepse nja 300 mln janë vjedhur. I shkatërroi fare. Ti nuk je monark absolut o zotëri. Kush të lë të bësh këtë. Njerëzve nuk iu duhet kush e ka vjedhur rrugën, cili kryeministër, cili ministër. Njerëzit nuk mund të paguajnë vjedhjen e të tjerëve. Në qoftë se është fakti që rruga ka mbetur e pambaruar”, tha Ngjela.
