Vrasjet, atentatet mafioze u rikthyen në kryefjalë të ditës dje. Situata kriminale ishte tejet e ashpër, e për këtë pati reagime të shpejta nga ana e opozitës. Në vetëm 24 orë u raportuan 4 vrasje. E fundit ishte atentati në autostradën Vlorë-Fier ku u ekzekutuan me 60 plumba dy persona dhe mbeti i plagosur edhe një tjetër.
Ish-prokurori Shkëlqim Hajdari, i cili ka qenë i ftuar në rubrikën “Opinion” për të folur për të këto ngjarje, tha se këto vrasje nuk i ngjajnë njëra-tjetrës. Duke bërë një pasqyrë të përgjithshme të asaj se çfarë ka ndodhur, z. Hajdari u shpreh se grupi i vrasjeve si i Elbasanit dhe Sarandës janë nga ato vrasje ku merret jeta e një personi për arsye banale.
Një tjetër kapitull janë vrasjet aksidentale, apo nga pakujdesia. Ai i mëshon fort faktit se policia duhet të ketë përgjigje të shpejtë e preçize. E po kështu duhet që të forcohen masat e punonjësve në terren. “Katër vrasje, por asnjëra e ngjashme me njëra-tjetrën. Vrasjet janë të gjitha të rënda, por më të rënda janë ato që kryhen nga grupe të strukturuara kriminale. Vrasja në Fushë-Krujë është vrasje e pastër, sipas transmetimit në media dhe nga mënyra se si është kryer. Këto janë shumë të ashpra. Grupi i vrasjeve si i Elbasanit mbrëmë dhe Sarandës sot janë vrasje në grindje e sipër, merret jeta e një personi për arsye banale. Grupi tjetër është ai i hakmarrjes. Një kapitull i katërt janë vrasje aksidentale, apo nga pakujdesia. Policia në këto raste duhet të ketë përgjigje, duhet të forcohen masat e punonjësve në terren”, tha ai.
Një atentat mafioz u shënua në aksin Vlorë-Fier, ku u ekzekutuan me 60 plumba kallashnikovi Shpati Lena, 37 vjeç dhe Hakim Xhezo, 34 vjeç. Në automjetin me të cilin ata udhëtonin (Mercedez Benz) ndodhej dhe një person tjetër, i cili është plagosur dhe ndodhet në gjendje të rëndë. Mendohet se në atentat kanë marrë pjesë tre persona: dy qitësa vrasës me pagesë dhe shoferi. I pyetur për këtë rast, Shkëlqim Hajdari deklaroi se ngjarje të tilla nuk ndodhin vetëm në Shqipëri, por edhe në vende të BE-së dhe SHBA-së.
“Ngjarje të tilla nuk ndodhin vetëm në Shqipëri, por edhe në vende të BE-së dhe SHBA-së. Ngjarje të rënda në shkolla kemi parë, njerëz terroristë. Të mos themi që Shqipëria është e veçantë. Rasti nuk është i parë, është i pamëshirshëm, kanë përvojë për të kryer vrasje të tilla. Arsye që kemi këtë përplasje mendoj se është që SPAK ka treguar që është i vendosur që nëpërmjet provave dhe shfrytëzimit të njerëzve të penduar, shumë shpejt të shkojnë drejt autorëve, kjo ka bërë bandave si duket të veprojnë”.
Dalja në skenë e Dumanit? “Njerëzit e përfshirë në krimin e organizuar po kuptojnë se nuk mund të penetrojnë dot, dhe se herët apo vonë do të mund të përballen me drejtësinë”.
Ndërkohë ai shtoi se strukturat duhet të bashkëpunojnë me njëri-tjetrin, për të vënë përpara përgjegjësisë autorët kryesorë. Duke qëndruar në të njëjtën linjë, ai shtoi më tej se krimi i bandave është ndërkombëtar. Z. Hajdari tha se sot është e provuar se një pjesë e madhe e autorëve jetojnë dhe punojnë në Dubai. Dubai është një nga qendrat ku njerëzit e krimit kanë gjetur strehim.
“Kjo duhet të jetë funksionale, një gjë pozitive mendoj që është se bashkëpunimi rajonal ndërkombëtar dhe besoj me ardhjen e z. Nano, ai ka krijuar bindjen se është një drejtues policie i besueshëm, dhe kjo rrugë duhet të vazhdojë sepse krimi i bandave është ndërkombëtar. Sot është e provuar se një pjesë e madhe e autorëve jetojnë dhe punojnë në Dubai. Dubai është një nga qendrat ku njerëzit e krimit kanë gjetur strehim.
Marrë shkas nga skema që atentatorët ndjekin për djegien e makinës që kryejnë vrasje, duke e lënë larg vendit të ngjarjes, ish-prokurori Shkëlqim Hajdari pohoi se kjo është një skemë e trashëguar.
“Kjo skemë është e trashëguar. Nuk është praktikë vetëm shqiptare. Grupet e strukturuara kriminale thuajse të njëjtën metodë përdorin”.
Reagimi i opozitës dhe a po përdoren politikisht këto ngjarje? “Me ligj Policia e Shtetit, SHISH është e depolitizuar. Politika mund të shërbejë vetëm duke motivuar policinë, dhe duke kërkuar nga qeveria, të bëhet presion nga opozita që të shihen kushtet e punës të punonjësve të policisë. A ka brenda policisë njerëz të lidhur me segmente? Po, ka! Kjo është detyrë e opozitës të denoncojë me fakte”.
