Huliganët boshnjakë shkaktuan kaos mbrëmjen e djeshme në stadiumin “Air Albania”. Ata sulmuan tifozët shqiptarë, kalimtarë të rastit dhe forcat e rendit pas përfundimit të sfidës mes Tiranës dhe Zrinjskit në Ligën e Konferencës. Policia ka reaguar për dhunën e ushtruar nga tifozët boshnjakë, pas ndeshjes mes skuadrës së Tiranës dhe HSK Zrinjski. Sipas policisë, është plagosur një punonjës policie dhe një tifoz, të cilët kanë përfunduar në spital dhe ndodhen jashtë rrezikut për jetën. Policia informon ndër të tjera se nuk ka pasur të shtëna me armë dhe vijon puna për shoqërimin e personave të tjerë të përfshirë në akte të dhunshme ndaj punonjësve të policisë.
Tiranë/Informacion paraprak
Më datë 19.07.2022, në stadiumin “Air Albania”, pas përfundimit të ndeshjes Tirana-HSK Zrinjeski Mostar i Bosnje Hercegovinës, gjatë daljes së tifozëve, shërbimet e Policisë kanë ndërhyrë për të shoqëruar disa tifozë të ekipit të Bosnje Hercegovinës, të cilët gjatë zhvillimit të ndeshjes kanë kanë hedhur sende të forta dhe lëndë piroteknike.
Gjatë momentit të shoqërimit të tyre, pjesa tjetër e tifozëve të këtij ekipi, ka kundërshtuar me forcë dhe me sende të forta punonjësit e Policisë, për të mos lejuar shoqërimin e tyre. Shërbimet e Policisë, për të neutralizuar aktet e dhunshme të tifozëve, kanë përdorur gaz lotsjellës për t’i shpërndarë ata. Si pasojë e akteve të dhunës nga ana e tifozëve, është dëmtuar një punonjës Policie si dhe një tifoz, të cilët ndodhen në spital, nën kujdesin e mjekëve, jashtë rrezikut për jetën.
Nga shërbimet e Policisë deri tani janë shoqëruar 25 tifozë. Sqarojmë opinionin publik që nuk ka pasur të shtëna me armë dhe vijon puna për shoqërimin e personave të tjerë të përfshirë në akte të dhunshme ndaj punonjësve të Policisë. Grupi hetimor nën drejtimin e Prokurorisë vijon punën për dokumentimin e plotë të rrethanave të ngjarjes.
