I dyshuari kryesor për vrasjen e biznesmenit Hekuran Billa, shtetasi Viktor Marku, ka mohuar të jetë i përfshirë në vrasjen e 40-vjeçarit. Teksa ka dhënë dëshminë e tij në Gjykatë, ai ka pretenduar se ditën kur Billa është ekzekutuar në zonën e “Komunës së Parisit” ka qënë në Mal të Zi, ku edhe u ndalua nga policia.
“Policia të gjejë autorët. Ditën e vrasjes e deri kur më arrestuan kam qenë në Mal të Zi. Policia të bëjë ç’të dojë, unë nuk kam vrarë njeri”, mësohet se është shprehur Marku, teksa merrej në pyetje.
Nipi i tij, Sebastian Mali, gjithashtu i dyshuar si bashkëpunëtor në vrasje, është lënë në masën “arrest me burg”. Edhe ai, njësoj si Marku, e ka mohuar përfshirjen në ngjarje.
Hekuran Billa u ekzekutua pranë “Qendrës Kristal” në Tiranë, ku kishte shkuar për të takuar motrën e tij që punonte në këtë qendër tregtare.
