Myrto Uzuni, ish-lojtari i Laçit tashmë aktivizohet tek Lokomotiva e Zagrebit në Kroaci. U deshën tri ndeshje që ai të gjente golin e arë, pasi në dy të parat ishte shumë i pafat me shtylla e traversa. Futbollisti beratas kreu një ndeshje të shkëlqyer në transfertën e Lokomotivës ndaj Goricës, ku kontribuoi me një gol dhe një asist për ta çuar rezultatin përfundimtar të takimit në 0-3.
Menjëherë pas shënimit të golit, Uzuni zgjodhi të festonte me shqiponjë një sinjal i qartë ky se objektivi i radhës për të është kombëtarja dhe të mendosh se para një viti e gjysmë luante në Kategorinë e Parë me Apoloninë.
Në një prononcim të shkurtër pas përfundimit të ndeshjes Uzuni tha se golin ia dedikonte familjes dhe se ëndrra e tij është një ftesë në kombëtaren shqiptare. “Ndjeva një çlirim të madh, pasi në ndeshjet e kaluar kam qenë i pafat. Golin ia dedikoj familjes sime. Do të punoj fort dhe do jap 100% për skuadrën. Objektivi im është të marr një ftesë nga kombëtarja e Shqipërisë, besoj se nëse vazhdoj të luaj mirë do ta realizoj këtë ëndërr timen”.
