Ylli brazilian, Neymar kujdeset që ta shprehë gjithmonë para mediave se është i lumtur në Paris dhe se do të respektojë kontratën me klubin. Por “Mundo Deportivo” ka zbuluar se Neymar nuk është aspak i lumtur dhe se ka kërkuar mes lotësh edhe rikthimin tek Barcelona.
Ai është penduar shpejt për atë lëvizje që bëri në një vit më parë, pasi tek katalanasit kishte në dhomë zhveshjes si të ishte shtëpia e tij dhe la shumë miq të mirë. Por PSG përmes babait të tij dhe Wagner Ribeiro e bindën atë se ishte më mirë të “fluturonte” i vetëm, larg nga hija e shokut të tij, Leo Messi.
Padyshim që edhe kontrata stratosferike kishte ndikimin e vet, por në Paris Neymar nuk gjeti atë ambient që iu premtua. Rivaliteti me Edison Cavanin për golashënuesin e ekipit, apo se kush ishte lideri ia bëri të vështirë sezonin. Po ashtu edhe pas shpërthimit të talentit francez, Kylian Mbappe ai e kuptoi se kishte vepruar gabim.
Neymar i ka kërkuar njërit nga drejtuesit e Barcelonës, me të cilin ka pasur raporte mjaft të mira se dëshironte kthimin tek “blaugranët”. Mes lotësh ai i ka kërkuar ndihmë drejtuesit që ta ndihmonte dhe të bënte ç’ishte e mundur. Kjo është ëndrra e tij, pavarësisht interesimit të Real Madridit.
Por, blaugranat nuk e duan këtë gjë. Ata janë shumë të zhgënjyer me Neymar, për mënyrën se si iku duke aktivizuar klauzolën, por dhe këmbëngulja e brazilianit, që ishte gati të çonte ish-ekipin e tij në gjykatë, vetëm për t’u larguar drejt Parisit. Mundësitë për një rikthim në Katalunjë për 26-vjeçarin, aktualisht janë shumë të vogla. Në rast se ai do të kthehet në Spanjë, fanella me të cilën mund ta shohim do të jetë ajo e Realit të Madridit.
