Presidenti Thaçi ka konfirmuar takimin që do të mbahet të enjten në Bruksel, me presidentin e Serbisë, Aleksandër Vuçiç. Ky është takimi i katërt i fazës finale për arritjen e marrëveshjes mes dy vendeve, që ndërmjetësohet nga Bashkimi Evropian.
Duke komentuar këtë takim, presidenti Thaçi e përshkroi atë si të vështirë, ndërsa thotë se më me dëshirë do të dialogonte më një dreq sesa me Vuçiçin.
“Pres që do të jetë një takim i vështirë, i rëndë, sepse homologu im nga Serbia është një bashkëbisedues i vështirë, i komplikuar e ne të njëjtën kohë edhe i ngarkuar. Mund të them se dëshirën më të madhe do të isha uluar me një dreq në tavolinë për të biseduar, sesa më Aleksandër Vuçiçin, sepse ai me tërë potencialin e tij, tërë arsenalin shtetëror të Serbisë, po punon për shpërbërjen e Kosovës si shtet por edhe dëmtimin e institucioneve të Kosovës. Natyrisht që unë do e përballojë, por nuk është e mjaftueshme përballimi i Serbisë, është me rëndësi që i gjithë spektri politik të kyçet në këtë proces, të nxirret sa më shpejt ajo platformë e Kuvendit të Kosovës, të bëhet ekipa e përbashkët e Kosovës, të jemi të gjithë së bashku ën tavolinë dhe të fitojmë këtë proces”, thotë ai.
Presidenti i Kosovës nuk pret që nesër të arrihet një marrëveshje. Ai thotë se finalizimin e saj do e mbyllë i gjithë spektri politik.
“Pres një dinamizim të këtij procesi final, por natyrisht se finalizimin do ta mbyllim i gjithë spektri politik dhe gjithë institucionet e Republikës së Kosovës”, thotë ai.
I pyetur për vendimin e Qeverisë së Kosovës, për masë prej 10% për produktet e importuara nga Serbia, ai nuk ka dashur ta komentojë.
“Pushtetet janë të ndara në Kosovë, nuk komentoj opinionet e as vendimet e institucioneve tjera. Secili institucion merr vendime merr përgjegjësitë dhe në të njëjtën kohë autoritetin e vet për atë vendimmarrje”, thotë ai për KosovaPress.
