Një ditë para protestës së opozitës së bashkuar, Ambasada e SHBA-ve në Tiranë ka një thirrje për shtetasit amerikanë. Në një deklaratë, ambasada fton qytetarët që të shmangin vendet ku bëhet protesta, teksa i referohet protestave të mëparshme, ku nuk ka munguar dhuna.
“Një demonstrim i madh pritet të zhvillohet pranë Zyrës së Kryeministrit më 25 maj 2019, duke filluar nga ora 18:00. Grupi synon të demonstrojë kundër qeverisë shqiptare dhe mund të lëvizë në vende të ndryshme në Tiranë. Kohëzgjatja e demonstratës është e panjohur. Demonstrimet e kohëve të fundit kanë përfshirë dhunën. Forcat e sigurisë kanë përdorur ujë dhe gaz lotsjellës për të shpërndarë turmat”, thuhet në njoftimin e ambasadës.
Nisur nga këto të dhëna, ambasada këshillon të gjithë amerikanët që ndodhen në Shqipëri:
Të shmangin grumbullimet e mëdha dhe fushat ku demonstratat janë të pashmangshme ose në vazhdimësi si dhe të monitorojnë mediat për zhvillimet më të fundit.
