E ardhmja e Elseid Hysajt tashmë është e konfirmuar që nuk do te Napoli. Ishte agjenti i mbrojtësit shkodran që i komunikoi klubit dëshirën e lojtarit, pasi nuk arriti të rinovonte kontratën. Por një tjetër arsye është minutat e pakët që ka pasur në dispozicion Hysaj me ardhjen e Ancelottit.
Pas Hysaj, përveç trajnerit Sarri, që është i apasionuar pas shqiptarit, në gjurmët e tij janë vënë edhe italianët e Interit. Sipas mediave të ndryshme, flitet se Spalletti ka simpati ndaj Elseidit ku njëkohësisht mund të zyrtarizohet ndonjë ofertë drejt tij. Ende pa u hapur merkatoja, për ekipin e ri të mbrojtësit shqiptar është hedhur një tezë tjetër, që mund të jetë transferimi i tij tek Roma.
Këtë gjë e thotë edhe gazetari italian, Valter De Maggio, ku sipas këtij të fundit ka shumë mundësi që vitin e ardhshëm ekipin e kryeqytetit ta marrë nën drejtim, Sarri. Në rast se ndodh një gjë e tillë atëherë Hysaj mund t’i bashkohet “njeriut të cigareve”, mënyra sesi quhet Sarri.
“Hysaj është vënë nën radarët e Interit. Por nëse Sarri do të largohet nga Chelsea dhe të marrë drejtimin e kryeqytetasve të Romës, atëherë nuk do të jetë çudi në rast se ai do të bashkohet me lojtarin e tij të preferuar, Hysajn, në Romë. Çështja e ekipit të ri të Elseidit, pritet që të ketë zhvillime menjëherë pas hapjes së merkatos së verës”, u shpreh Maggio për mediat italiane.
