Bayern Munchen këtë vit është treguar një skuadër me oshilacione. Nuk e nisi aspak mirë sezonin nën drejtimin e Niko Kovaç, duke humbur edhe kreun e kampionatit, pasi u parakalua nga skuadra si Leipzig dhe Borussia Mönchengladbach. Pas kësaj drejtuesit vendosën ta shkarkojnë trajnerin kroat dhe në vend të tij lanë zëvendës trajnerin Hans-Dieter Flick.
Gjermani bëri mjaft mirë dhe arriti të marrë më të mirën prej lojtarëve, duke e sjellë skuadrën në krye dhe kualifikuar në fazat me eliminim direkt në Champions. Një nga lojtarët e ringjallur me ardhjen e Flick në krye ishte edhe Thomas Muller. Sulmuesi pas shumë vitesh e shihte veten “të abonuar” me stolin dhe tregon për mediet gjermane se po mendonte të largohej kur në krye të skuadrës ishte Kovaç.
“Në vjeshtë mbeta jashtë formacionit titullar për gjashtë ndeshje radhazi. Ishte e vështirë dhe po mendoja të largohesha. Ndryshimi në stol solli ndryshimin e lojës tonë dhe gjithçka filloi të përmirësohej. Jo vetëm që fillova të aktivizohesha më shumë, por lashë edhe shenjën time në disa ndeshje“, u shpreh ylli bavarez.
