Nga: Mentor Kikia
Edi Rama do të prezantojë javën tjetër qeverinë e re. Në fakt s’ka asgjë të re, pasi është thjeshtë vazhdimësi. Por çfarë do të sjellë mandati i tretë, apo më saktë, çfarë duhet të sjellë? Ndryshimi nuk do të vijë nga emrat e ministrave, por nga filozofia e tyre, dhe mbi të gjitha, aftësia për të parë më larg se fundi i mandatit të tretë.
“Letrave nga populli” u ka ikur koha, por unë po përpiqem të bëj timen….
Padyshim që çdo gozhdë e ngulur në këtë vend është e nevojshme. Ndaj dhe asnjë investim nuk mund të thuhet se është tepër. Për 30 vjet ne dëgjojmë si prioritete, rrugë, ujë, drita…Por unë mendoj se ka disa fusha edhe më prioritare. Do të rendis dy, shkurtimisht:
Arsimi:
Me arsim unë nuk kuptoj shkollat e reja, ndërtesa të riparuara apo të reja fringo. Me shkollë unë kuptoj atë që bëhet brenda ndërtesës së shkollës. Cilësia e mësimdhënies, kurrikulat-cilësia e teksteve, laboratoret, futja e metodave që promovojnë nxënësit e mire… Shdërrimi i shkollës në një mjedis ku nxë dhe edukohesh, futja e konkurseve mes shkollave, mes klasave, krijimi një mjedisi që prodhon dhe promovon vlera, për tu treguar fëmijëve se modeli i suksesit nuk është ajo këngëtarja që lahet në vaskë mbuluar me Euro, as ai që këndon duke thithur kokainë në tavolinë. Në arsimim dhe edukim, më shumë se paraja kanë vlerë mendja, vizioni dhe përkushtimi. Dikur, unë kam marrë pjesë në një nga tryezat që zoti Rama, atë kohë në opozitë, organizonte për arsimin dhe kam thënë: Unë e kam bërë shkollën në një ndërtesë ku në mes të klasës kishim vënë një kovë që priste pikat e ujit që pikonte nga tavani kur binte shi. Ndërsa për tu ngrohur kishim një sobë që e mbushin me shkarpa. Por në atë klasë bëhej MËSIM dhe injektohej edukatë. Vazhdoj të mendoj se ajo shkolla ka qenë më e mire se këto te rejat moderne, ku mësuesi flet dhe nxënësit shikojnë Tik-Tok në telefona, edhe pse në tavane nuk pikon shi dhe për ngrohje ka kondicionerë.
Investimi në arsim nuk prodhon të ardhura dhe as “impakt publik”. Të investosh në arsim do të thotë të mbjellësh një pemë, e cila do të bëjë kokrra pas 20-30 vjetësh. Por kjo duhet bërë sot Z.Kryeministër, të mendojmë për pas 30 vjetësh!
Mjedisi:
Kjo verë na tregoi se sa zbuluar jemi për ti bërë ballë zjarreve. Dimri do të na ritregojë sa zbuluar jemi për tu bërë ballë përmbytjeve. Klima ka ndryshuar, vera është me gjatë, më e nxjehtë, më e thatë. Dimri i ngrohtë dhe reshjet bien pa asnjë rregull natyre, duke shkaktuar gjëma në pak orë. Me gjithë ligjet që miratojë, ne vazhdojmë të shkatërrojmë pyjet (ato që kanë mbetur) dhe lumenjve u jemi sulur sërish si para 20 viteve. Deti po përparon, duke rritur shkallën e erozionit dhe akush nuk e di se sa do ti jetë afruar Lezësh apo Durrësit pas 10 vjetësh, ndërsa ne vazhdojmë të ndërtojmë edhe më pranë ujit. Pa folur për menaxhimin e mbeturinave, që po na mbysin. Sërish duhet të mendojmë përtej një mandati, të mendojmë për 10-20 e më shumë vite përpara.
Të investohet në këto fusha, nuk merr falenderime të menjëhershme. Por të jemi të sigurtë, pas të paktën 1 dekade, do të marrim mallkime, padyshim, nëse nuk veprojmë tani.
