Ministri i Punëve të Brendshme të Serbisë, Aleksandar Vulin, ka fyer Presidenten e Kosovës, Vjosa Osmanin. Vulin i është përgjigjur deklaratës së Osmanit, ku ajo priste që “Serbia të binte në gjunjë” teksa kujtonte krimet e serbëve në Kosovë, shkruan media serbe b92.
“Nëse Osmani do të kishte fytyrën siç e ka barkun, për gënjeshtrat që thotë, do të përkulej para ‘shtëpisë së verdhë’. Të besosh gënjeshtrën e Osmanit për gjenocidin serb në Kosovë dhe Metohi është si të besosh Shiptarët që dogjën manastiret janë luftëtarë për vlerat e krishtera dhe evropiane,”- u shpreh Vulin.
Vulin nuk është hera e parë që fyen politikanët shqiptarë dhe shqiptarët në përgjithësi. Në fakt, ai ka nxjerr nga konteksti deklaratën e Osmanit. Ajo nuk ka thënë se pret që Serbia të bie në gjunjë, ashtu siç pretendon ministri Vulin.
“E kam zgjedhur nocionin gjenocid me vetëdije. Ai përshkruan qëllimin e një vendi për të shfarosur një komb. Dhe pikërisht kjo ka ndodhur në Kosovë. E kam fjalën për ngjarjet në Mejë, e njohur si ‘Srebrenica e Kosovës’, dhe në Poklek, ku jo vetëm janë vrarë 54 fëmijë dhe plaka, por pastaj edhe janë djegur. Qëllimi ka qenë që të zhduken nga faqja e dheut. Willy Brandt ka thënë njëherë se kur mungojnë fjalët, duhet rënë në gjunjë. Pikërisht këtë e presim nga Serbia: rënien në gjunjë”, ka thënë Osmani, si përgjigje për gazetarin që insistoi të dijë pse po e përdor termin gjenocid për krimet që ka kryer Serbia.
