Policia e Shtetit
Nënshkruhet shtyrja me 6 muaj e afatit të Projektit ORKA
Drejtor i Përgjithshëm i Policisë së Shtetit Ardi Veliu, Drejtori i Departamentit për Krimet e Rënda dhe Krimin e Organizuar në BKA z. Stefan MICHEL dhe Drejtori i Krimeve z. Stefan SUPPER, duke vlerësuar treguesit e arritur, nënshkruan online, zgjatjen e marrëveshjes së partneritetit në kuadër të Projektit “ORKA” deri në muajin gusht 2021.
Fjala e Drejtorit të Përgjithshëm të Policisë së Shtetit gjatë ceremonisë së nënshkrimit të marrëveshjes për vazhdimin e Projektit ORKA
I nderuar z. Michel, të nderuar drejtues të Projektit ORKA, z. Supper dhe z. Hagen,
I nderuar z. Primas,
Të nderuar kolegë e pjesëmarrës,
Bashkëpunimi i Policisë shqiptare me autoritetet ligjzbatuese gjermane ka ardhur duke u rritur nga viti në vit. Shkëmbimi i informacioneve dhe zhvillimi i operacioneve të përbashkëta janë intensifikuar me vendosjen e oficerëve ndërlidhës të të dy vendeve tona, përkatësisht në Tiranë dhe në Berlin. Ndërkohë, autoritetet gjermane na kanë mbështetur me asistencë teknike, por edhe me mjete dhe pajisje. Janë zhvilluar trajnime për punonjësit e Policisë së Shtetit dhe çdo vit, një përfaqësues i Policisë së Shtetit shkollohet dhe praktikohet në Gjermani.
Hartimi i Projektit ORKA dhe nënshkrimi i Marrëveshjes së Partneritetit në shtator të vitit 2018, që u zgjat edhe me një vit në shkurt të vitit 2020, ishte një hap i mëtejshëm në drejtim të forcimit të bashkëpunimit dhe intensifikimit të luftës së përbashkët kundër krimit të organizuar, trafiqeve të paligjshme dhe pastrimit të parave, duke e çuar këtë bashkëpunim në një nivel më të lartë.
Njësia ORKA pranë Policisë së Shtetit u zyrtarizua në shkurt të vitit 2019. Në këtë kuadër, u ngrit grupi i punës dhe u caktuan me detyrë në përbërje të grupit ORKA në Shqipëri, pesë hetues dhe një analist i drejtimit kundër krimit të organizuar, si dhe janë përcaktuar përshkrimet dhe procedurat e punës për funksionimin e kësaj njësie.
Ne vlerësojmë se drejtuesit e Projektit, oficerët ndërlidhës, por dhe oficerët zbatues, kanë bërë një punë të shkëlqyer, duke asistuar ngritjen dhe vënien në funksionim të kësaj njësie të specializuar, me qëllim shenjëstrimin e grupeve kriminale të krimit të organizuar që vepronin mes vendeve tona si dhe gjurmimin e parave të tyre.
Njësia ORKA pranë Policisë së Shtetit u pajis me mjetet dhe infrastrukturën e nevojshme, si dhe me bazat e të dhënave të Policisë së Shtetit dhe agjencive të tjera ligjzbatuese të vendit tonë. Kjo i mundësoi verifikimin dhe shkëmbimin e shpejtë të informacionit kriminal dhe krijimin e bazave për fillimin e hetimeve të rëndësishme. Në vazhdimësi, kjo njësi u asistua në çdo hap nga kolegët gjermanë, të cilët u atashuan pranë saj në Policinë e Shtetit.
Përveç korrespondencës së ndjekur nëpërmjet oficerit ndërlidhës është bërë i mundur edhe instalimi i një e-maili të kriptuar, i aksesueshëm nga të gjithë anëtarët e grupit ORKA, më qëllim shkëmbimin e informacionit në një kohë sa më të shpejtë dhe në mënyrë të sigurt.
Gjatë zhvillimit të Projektit, përveç shkëmbimit të informacionit dhe hetimeve të përbashkëta, janë kryer edhe takime operacionale; vizita reciproke të hetuesve dhe ekspertëve te analizës në vendet respektive në kuadër të hetimeve si dhe trajnime të ndryshme.
Bashkëpunimi me autoritet gjermane ka rezultuar efikas dhe shkëmbimi i informacionit është bërë në kohë reale në fillimin dhe ndjekjen e procedimeve penale. Në kuadër të këtyre procedimeve penale, vetëm gjatë vitit 2020 janë organizuar edhe finalizuar 7 operacione të përbashkëta, ku janë arrestuar anëtarë të grupeve të strukturuara kriminale në të dy vendet si dhe janë konfiskuar sasi të konsiderueshme lëndë narkotike kokainë e marijuanë, si dhe armë zjarri, municione e para kesh. Vlejnë të përmenden Operacionet “ATHOS”, “SAFETY CAR”, “LADINA”, “AGIMI”, etj.
Me marrëveshjen që po nënshkruajmë sot, shpreh bindjen se po kontribuojmë që rezultatet e arritura të çohen më tej gjatë vitit 2021. Faleminderit!
Projekti operativ i Policisë Kriminale “ORKA” u miratua fillimisht në konferencën e Ministrave të Brendshëm gjermanë, me qëllim luftën kundër krimit të organizuar në lidhje me drogën, në Kosovë dhe Shqipëri.
Në fokus të projektit është lufta e vazhdueshme në nivel kombëtar dhe ndërkombëtar ndaj krimit të organizuar, me pika kyçe si:
– hetimi, identifikimi dhe goditja e grupeve kriminale shqipfolëse dhe aktivitetit të tyre në Gjermani dhe vende të tjera të BE-së,
– dokumentimi i lidhjeve të veprimtarisë kriminale ndërmjet grupeve shqiptare dhe rezidentëve në Gjermani,
– nisja e hetimeve të përbashkëta,
– identifikimi i pasurisë kriminale dhe konfiskimi i saj,
– konsolidimi dhe intensifikimi i bashkëpunimit dypalësh,
– financimi i takimeve operacionale,
– vizita reciproke të hetuesve dhe ekspertëve te analizës në vendet respektove, në kuadër të hetimeve aktuale.
